رووداوێکی هاتوچۆ لە سیواس ١٨ قوربانیی لێکەوتەوە

سیواس - AA

لە ئەنجامی پێکداکێشانی پاسێک و ئۆتۆمبیلێک لە پارێزگای سیواس، بە پێی زانیارییە بەراییەکان، کەسێک گیانی لەدەستدا و ١٧ کەسی دیکەش برینداربوون.

پاسەکە لە پارێزگای ئەرزینجانەوە بەرەو پارێزگای بورسا رۆیشتووە و ئۆتۆمبیلەکەش لەسەر هەمان ئاراستە بووە لە گوندی یارهیساری سەربە شارۆچکەی هافیک، پێکیاندا کێشاوە.

لە ئەنجامی رووداوەکەشدا پاسەکە وەرگەڕاوە و کەوتووەتە کەندەڵانێکەوە و شۆفێری ئۆتۆمبیلەکەش لە شوێنی رووداوەکەدا گیانی لەدەستداوە.

پاسەکە ٤٤ سەرنیشینی هەڵگرتبوو و بە پێی زانیارییە بەراییەکان ١٧یان برینداربوون. بریندارەکان بۆ نەخۆشخانەکانی سیواس و هافیک گوازراونەتەوە.