کورتوڵموش: "پێویستە هەرچی زووە تێکەڵبوونی هەسەدە بە حكوومه‌تی نوێی سووریا ده‌سته‌به‌ر بکرێت"

ئەنقەرە - AA

سەرۆکی پەرلەمانی تورکیا، نوعمان کورتوڵموش سەبارەت بەو ڕاپۆرتەی کۆمیسیۆنی ھاودەنگیی نەتەوەیی، برایەتیی و دیموکراسیی ئامادەی کردووە، ڕایگەیاند: "ھیوادارم لە ئایندەیەکدا کە زۆر دوور نەبێت دەقێک بڵابکرێتەوە کە ھەمووان لەسەری کۆک بن و ھیچ تێبینییەکی ناڕەزایی لەسەر نەنوسرێت".

بەبۆنەی ١٠ی کانوونی دووەم، ڕۆژی ڕۆژنامەنووسان، کورتوڵموش سەردانی پەیامنێرانی پەرلەمان و کۆمەڵەی پەیامنێرانی پەرلەمانی کرد.

لە وەڵامی پرسیارێکدا سەبارەت بەوەی کەی ڕاپۆرتی کۆميسیۆنی ھاودەنگی نەتەوەیی، برایەتیی و دیموکراسیی ئامادە دەکرێت، کورتوڵموش جەختی لەسەر ئەوە کردەوە کە کۆميسیۆنەکە وەک نیشانەیەکی دیموکراسی قبوڵ کراوە و، گوتی: "ھیوادارم لە ئایندەیەکدا کە زۆر دوور نەبێت دەقێک بڵابکرێتەوە کە ھەمووان لەسەری کۆک بن و ھیچ تێبینییەکی ناڕەزایی لەسەر نەنوسرێت".

سەبارەت بە پێشھاتەکانی سووریا، کورتوڵموش ڕایگەیاند: "پێویستە لە چوارچێوەی ڕێککەوتنی ١٠ی ئاداردا ھەرچی زووە تێکەڵبوونی ھەسەدە بە حکوومەتی نوێی سووریا دەستەبەر بکرێت".

سەرۆکی پەرلەمانی تورکیا کورتوڵموش، باسی لە دەستوەردانی سەربازی ئەمریکا لە ڤێنیزوێلا کرد و، ڕایگەیاند: "ئەمە ژێرپێخستنی یاسا نێودەوڵەتییەکانە. پێویستە مرۆڤایەتی بە شێوەیەکی ھاوبەش دژی بوەستێتەوە".