موسڵمانانی ئاراكان به‌ره‌به‌ره‌ كۆمه‌ڵكوژ ده‌كرێن

ئەنقەرە - AA

براوەی خەڵاتی نۆبلی ئاشتی و یاساناسی ئێرانی شیرین عیبادی دەڵێت: ''خوازیاری دادگاییکردنی سەرۆکی پارتی دەسەڵاتداری میانمار ئنگ سان سو لە دادگایەکی نێودەوڵەتی بێلایەنم''.

عیبادی لە لێدوانێکدا بۆ پەیامنێری ئاژانسی ئانادۆڵو وێڕای جەختکردنەوەی لەو کارەساتانەی بەسەر موسڵمانانی میانمار دێ و بە کۆمەڵکوژ ناوھێنانی گوتی: ''بەو جۆرەی پسپۆڕانی بوارەکە دەزانن، موسڵمانانی ئاراکان لە ماوەی ٤٠ ساڵی رابردوودا بەرە بەرە کۆمەڵکوژ دەکرێن''.

عەبادی بەم شێوازە درێژەی بە قسەکانیدا: ''لەگەڵ مایرد ماگورێ کە چالاکێکی مافەکانی مرۆڤە و خەڵکی ئیرلەندایە و ھەروەھا تەوەکول کارمان-ی یەمەنی چووینە سنوورەکانی بەنگلادیش. لەوێ لەگەڵ ١٠٠ ژنی ئاراکانی کە لە نێوان ئاداری ٢٠١٧ تا ئابی ٢٠١٨ بە شێوەی پلاندارێژراو کەوتبوونە بە شاڵاوی دەستدرێژی دیدارمان کرد. لە جوگرافیای جیاجیاکان لەگەڵ خانەوادەکان کۆبووینەوە و گۆبیسی بەسەرھات و ترس و دڵەڕاوکێکانیان بووین. باس لە بەسەرھاتە خوێناوییەکانیان ناکەم. زانیاری تەواومان لەسەر کردەوە دژە مرۆییەکانی سوپای میانمار دژ بە ژنان، پیاوان، لاوان، پیر و بەھێز و بێھێز وەرگرت''.

- سو چی ھەستێکی ئیسلامۆفۆبیای ھەیە

عیبادی وێڕای ئاماژەدان بە پێکھاتەی سەربازانی سوپای میانمار کە بوزیین و لە رابردووە تا ئێستا ئەوان روانگەیەکی دژە ئیسلامیان ھەیە، گوتی: ''سو چی تەنیا سەرۆکایەتی پارتێک ناکات کە دژی موسڵمانانە بەڵکو رادەگەیەنێ کە وڵاتەکەی بە رێگەی سوپاوە لە تیرۆریزمی ئیسلامی دەپارێزێ و بەم شێوەیە بە تەواوی کەوتووەتە ھەستێکی ئیسلامۆفۆبیایی''. ‌

عیبادی لەبارەی ئینکاری کردنی ئەو کۆمەڵکوژییەی کە سوپای میانمار دژ بە موسڵمانەکان ئەنجامی دەدات لەلایەن سو چی کە وەک خۆی خاوەنی خەڵاتی ئاشتی نۆبڵە، گوتی: "ئەوەی کە زۆر بێزارکەرە ئەوەیە کە گشت ئەو بەڵگانەی پەیوەندیدارن بە کۆمه‌ڵکوژی مووسڵمانانی ئاراکان و دەستدرێژی سێکسی بۆ سەر ئافرەتانی ئاراکان، لەلایەن سو چی رەتکراونەتەوە ".

عیبادی ئاماژەی بەوەشدا کە دوێنێ سەرکۆماری فەڕەنسا، ئێمانوێل ماکرۆن کۆکوژییەکەی ئاراکان بە جینۆساید ناوبردووە و لەمبارەیەوە گوتیشی: "خوازیارم سەرۆکی پارتی دەسەڵاتداری میانمار، سو چی و جەنەڕاڵەکانی میانمار ھەروەکو سەرۆک ئێمانوێل باسی لێوە کردووە، بە تاوانی جینۆساید لە دادگایەکی سەربەخۆ و نێودەوڵەتی دادگایی بکرێن".