ئەمریکا.. لە زۆرێک لە زانکۆکاندا بە ئۆنلاین وانە دەخوێندرێت

نیویۆرک - AA

بەهۆی هەڵکشانی خێرای حاڵەتەکانی تووشبوون بە پەتای ڤایرۆسی کۆرۆنای نوێ لە ئەمریکا لە زۆرێک لە زانکۆکاندا بڕیاری خوێندنی ئۆنلاین درا.

لە زیاتر لە ٧٠ زانکۆدا لە ٢٦ ویلایەتی ئەمریکا، بڕیاردرا وەرزی دووەمی خوێندن لە رێگەی ئۆنلاینەوە بەردەوام بێت.

زانکۆی هارڤارد رایگەیاند کە لە سێ هەفتەی یەکەمی ساڵی نوێدا، بەشێوەی ئۆنلاین وانە دەخوێنن و ئەگەر دۆخەکە ئاسایی ببێتەوە ئەوا لە کۆتایی کانوونی دووەمدا دەگەڕێنەوە بۆ هۆڵەکانی خوێندن.

زانکۆی شیکاگۆ بڵاوی کردەوە کە بۆ ماوەی دوو هەفتە دەستپێکی وەرزی دووەمی خوێندن دوادەخەن و لە دوو هەفتەی یەکەمی دەوامیشدا، وانەکان بەشێوەی ئۆنلاین دەخوێندرێت.

هاوکات زانکۆکانی جۆرج واشنتۆن، یالی، کۆلۆمبیا بەشێوەی ئۆنلاین بەردەوام دەبن لەسەر خوێندن.