بریندارانی چەکی کیمیایی داعش رەوانەی تورکیا کران

١٥ کەس لە بریندارانی چەکی کیمیایی داعش بە ھۆی نەبوونی چارەسەریان لە عێراق لە رێگەی فڕۆکەخانەی نێودەوڵەتی ھەولێر رەوانەی تورکیا کران و بە پێی دوایین ئامار زیاتر لە دوو هەزار و 500 برینداری چەکی کیمیایی لە تازەخورماتوو تۆمارکراوە.
یەکێک لە بریندارەکان بە ناوی محەممەد حوسەین بۆ ئاژانسی ئانادۆڵو گوتی: "داعش زیاتر لە ٤٠ بۆمبی کیمیایی لە ناحیەی تازە خورماتوو دا و بووە ھۆی ئەوەی کە ئێمە جەستەمان بسووتێ و دوای لە کەرکووک و بەغدا چارەسەری ئێمە نەکرا بەڵام سوپاسی بەرەی تورکمانی دەکەین کە توانیان لەگەڵ تورکیا هەماهەنگی بکەن بۆ چارەسەری ئێمە و داوا لە کۆمەڵگەی نێودەوڵەتی دەکەین بە دەنگ ئێمەوە بێن".

لە نێو بریندارەکان چەند منداڵێکی بچوکیش ھەیە. یەکێک لەو منداڵانە تەمەنی یەک ساڵ بوو بە ناوی تۆقا یاشار کە نیوەی جەستەی سووتابوو. باوکی تۆقا بە گریانەوە دیگوت "ئەو منداڵە گوناھی چییە کە داعش کیمیایی لێ دەدات".

پەرلەمانتاری بەرەی تورکمانی لە توزخورماتوو لە پەرلەمانی عێراق نیازی میمارئۆغڵو بۆ ئاژانسی ئانادۆڵو گوتی: "ئەوەی بە سەری تورکمانەکان ھاتەوە ھەموو جیھان دەزانێت و ئەوەش نوێ نییە ھەر لە سەرەتای ھاتنی داعش کارەسات بەسەریان ھاتووە و ئەوەی لە چەند رۆژی رابردوودا روویدا زۆر دڵتەزێن بو و لە کەرکووک و بەغدا نەیانتوانی ئەو بریندارانە چارەسەر بکەن و خۆشبەختانە وەک ھەمیشە دیسان حکوومەتی تورکیا لە تورکمانەکان خاوەندارێتی کرد و توانیمان ئەو نەخۆشانەی کە رەوشیان خراپە رەوانەی نەخۆشخانەکانی تایبەتی تورکیای بکەن و لە سەر حیسابی حکوومەتی تورکیا چارەسەر بکرێن".

بەرپرسی راگەیاندن بەرەی تورکمانی ئیستبراق یازارئۆغڵو گوتی: "مووشەکەکانی داعش دوای پشکنین دەرکەوت گازی خەردەلیان هەبووە کە خەڵکی بێتاوانی کردووەتە ئامانج و تا ئێستا دووهەزار و 600 کەس تووشبووی ئەو گازە ھەیە و ١٥ کەس لەوانە رەوشیان زۆر خراپە و حکوومەتی عێراقی نەیتوانی چارەسەریان بۆ بکات و لێی بێدەنگ بوون و ئێمە داوامان کردووە کە بۆ ئەم پرسە بان کی مۆن سەردانی بەغدا بکات".

پێشتر داعش لە چەندین شوێن لەبەرەکانی جەنگ چەکی کیمیایی دژی پێشمەرگە بەکارھێناوە، بەتایبەت گازی خەردەل و کلۆر و لەلایەن رێکخراوی قەدەخەکردنی چەکی کیمیاییەوە پشتڕاست کرایەوە کە پارسال لە مانگی ھەشتی ٢٠١٥ بەکاری ھێناوە و ژماریەک پێشمەرگە بریندار بوون. دەگوترێ داعش چەکی کیمیایی لە ناوچەی تەدمووری سووریا و هەندێک ناوچەی عێراق دەستکەوتووە.
گوندی بەشیر کە پێنج کیلۆمەتر لە خورماتوو دوورە و نزیکەی دووساڵ دەبێت لە ژێر دەسەڵاتی داعش دایە.
ناوی ئەو کەسانەی رەوانەی تورکیا کران: "محەممەد نەدھەر، حەسەن عەلی، مەیسوون عەبدۆڵا، لەیلا عەبدۆڵا، حەسەن حوسێن، ئەیاد غالیب، تۆقا یاشار، عەلی مەحموود، عەلی حەسەن، فاتیمە مستەفا، زەینب ئەکبەر، ئەقیل عومەر، محەممەد حوسەین، نەجمەدین عەبدۆڵا و رەغدە محەممەد".

لە رۆژی 9/3/2016 بەھۆی ئاراستەکردنی ٤٠ مووشەکی پڕکراو لە ماددەی کیمیایی لە گوندی بەشیرەوە بۆ ناحیەی تازەخورماتوو، سەدان ھاووڵاتی ناوچەکە بریندار بوون و منداڵێکی تەمەن دوو ساڵیش بە ناوی فاتیمە سەمیر بەھۆیەوە گیانی لەدەستدا.