بوومەلەرزەیەک بەگوڕی ٧،١ پلە باشووری مەکسیکی ھەژاند

بۆگۆتا ــ AA

بوومەلەرزەیەک بەگوڕی ٧،١ پلە لەسەر پێوەری رێختەر، ویلایەتی گیڕێرۆ باشووری مەکسیکی ھەژاند.

روانگەی بوومەلەرزەزانی نیشتمانیی مەکسیک لە راگەیەندراوێکدا ئاماژەی بەوەداوە کە بوومەلەرزەکە سێشەممە لە کاتژمێر ٢٠:٤٧ بە کاتی ناخۆ لە دووری ١٤ کیلۆمەتر باشووری رۆژھەڵاتی شاری ئاکابۆڵکۆ روویداوە.

باسی لەوەشکردووە کە بوومەلەزرەکە لە قۆڵایی ١٠ کیلۆمەتر روویداوە.

سەرۆکی مەکسیک، ئەندرێس مانوێل لۆپێز ئۆبرادۆر لە تویتێکدا رایگەیاندووە کە بوومەلەرزەکە زیانی گەورەی لێ نەکەوتووەتەوە.

لای خۆیەوە فەرمانڕەوای ویلایەتی گێرێرۆ، ھیکتۆر ئاستودیلۆ رایگەیاندووە کە یەک کەس بەھۆی بوولەمەرزەکەوە گیانی لەدەستداوە و جەختی کردەوە کە مەترسی روودانی تسۆنامی لە بەندەری ئاکابۆڵکۆ بەھۆی بوومەلەرزەکەوە لە ئارادا نییە.

پێشتر دەستەی رووپێویی جیۆلۆجیی ئەمریکا رایگەیاندبوو کە توندی بوومەلەرزەکە ٧،٤ پلە بووە.