جامی جیهانیی لە کۆشکی ئێلیزێیە

پاریس - AA

یاریزانانی هەڵبژاردەی فەڕەنسا، پاڵەوانی مۆندیالی ٢٠١٨ی رووسیا، گەیشتنەوە پاریس.

دوای ئەوەی رۆژی یەکشەممە لە یاریی کۆتاییدا بە ئەنجامی ٤-٢ لە هەڵبژاردەی کرواتیایان بردەوە، دوێنێ یاریزانانی هەڵبژاردەی فەڕەنسا بۆ تۆپی پێ گەڕانەوە وڵاتەکەیان.

دوای گەیشتنەوەیان، یاریزان و کۆی هەڵبژاردەکە لە کۆشکی ئێلیزێ لە لایەن سەرکۆماری فەڕەنسا، ئیمانوێل ماکرۆن و هاوسەرەکەی، بریجت ماکرۆن پێشوازییان لێکرا.

ماکرۆن یەک یەک سڵاوی لە یاریزانان و راهێنەر، دیدێ دیشامپ کرد و لە خوانێکدا کە هەزار و ٣٠٠ کەس ئامادەیبوون، گوتارێکی پێشکەشکرد.

ماکرۆن گوتی: "سوپاستان دەکەم بۆ بردنەوەی ئەم جامە و دڵخۆشکردنمان. سوپاستان دەکەم بۆ ئەوەی یەکگرتوو بوون. سوپاسی ئەو خێزانانە دەکەم کە لێرەن و سوپاسی هەڵبژاردەی وڵاتەکەم دەکەم. مەگۆڕێن، ئەم پێکهاتەیەتان زۆر باشە".

سەرۆکی فەڕەنسا بەپێویستی زانی کە یاریزانانی هەڵبژاردەی وڵاتەکەیان بیریان نەچێت لە چییەوە گەیشتوونەتە ئەو ئاستە و تیشکی خستەسەر ئەوەی هەموو فەڕەنسییەکان پشتیوانی هەڵبژاردەکەن.

هاوکات کۆشکی ئێلیزێ، بە یاریزانان و راهێنەری راگەیاند کە لەماوەی چەند مانگێکدا لە لایەن ئیمانوێل ماکرۆن-ەوە مەدالیای لێژیۆن دۆنێریان کە باڵاترین مەدالیایە، پێدەدرێت.