خاڵە بەکر، چیرۆکی نابینایەکی سەرکەوتوو
ـ خاڵە بەکر پیاوێکی نابینای دانیشتووی شاری سلێمانییە، بەڵام نابیناییەکەی نەک نەبووەتە رێگر لەبەردەم کارەکانی ژیانیدا بەڵکو بووەتە چاوساغی چاوساغەکان و نزیکەی ٢٠ ساڵە کاری کڕین و فرۆشتنی خانوو زەوی دەکات.
سلێمانی ـ AA
بەشێک لەو کەسانەی خاوەن پێداویستی تایبەتن و ئەندامێکی جەستەیان بەھەر ھۆکارێک لەدەستداوە ، کەمئەندامییەکەیان نەبووەتە ھۆی ئەوەی لە ژیاندا چۆکیان پێدابدات و لە ماڵەوە بمێننەوە و ژیانێکی ناھەموار بەڕێبکەن، بەپێچەوانەوە بونەتە نموونەی سەرکەوتنی ژیان و لە ھەندێک بواردا زۆر باشتر لەو کەسانە کار دەکەن کە لەشساغ و تەندروستییەکی باشیان ھەیە و کێشەیەکی ئەوتۆیان نییە لە ژیاندا.
بەکر عەلی ئەحمەد ناسراو بە خاڵە بەکری نووسینگە یەکێک لەو چیرۆکە سەرکەوتووانەیە کە وەک کەسێکی نابینا لە بواری خانووبەرە کار دەکات و ئەزموونێکی سەرکەوتووی لە کارەکەیدا ھەیە .
خاڵە بەکری تەمەن ٥٦ ساڵان دەرچووی شەشی ئامادەییە و لە ساڵی ١٩٩٣ بە ھۆی نەخۆشییەکەوە بینایی چاوەکانی لەدەستداوە ، ئەو لە ساڵی ٢٠٠٠ەوە دەستی بە کاری کڕین و فرۆشتنی خانوو و زەوی کردووە و ماوەی ٢٠ ساڵە بەردەوامە لەسەر کارەکەی و ئێستا ناوێکی دیاری شاری سلێمانییە لە بوارەکەی خۆیدا ، بەجۆرێک زۆربەی نووسینگەکانی تری شارەکە رۆژانە پەیوەندییان ھەیە لەگەڵی و پرس و راوێژی پێدەکەن لەو بوارەدا.
سەبارەت بە سەختی ئەنجامدانی کارێکی لەو شێوەیە بۆ کەسێکی نابینا کە رۆژانە پێویستی بە مامەڵەکردن و ھاتن و رۆشتن و بینین ھەیە و بۆ کەسانی چاوساغیش سەختی خۆی ھەیە، خاڵە بەکر کە لە کاتژمێر حەوتی بەیانییەوە دەستی بە کارکردن کردووە و ھیلاکی و ماندوێتی بە رووخسارییەوە دیارە دەڵێت "ھەموو کارێک لە دنیادا کە مرۆڤ دەیگرێتە دەست کەموکورتی و گیروگرفتی خۆی ھەیە ، گرنگ ئەوەیە خاڵە بەکر توانیویەتی ھەر گرفت و کێشەیەک کە لەو بوارەدا رووی تێکردووە بە دڵێکی فراوانەوە چارەسەری کردووە و رۆژێک لە رۆژان بیرم لەوە نەکردووەتەوە کە کێشەیەک ببێتە ھۆی ئەوەی کارەکەم بەجێبھێڵم ، بەڵکو ھەموو کات وەک نێوەندێک لە نێوان کڕیار و فرۆشیار مامەڵەم کردووە و نەمھێشتووە لایەکیان بە ھۆی منەوە زیان بکات".
ئەو ھەروەھا گوتی: "ئەو کەسانەی کە بۆ یەکەمجار دێنە نووسینگەکەم و دەزانن نابینام زۆر سەرسام دەبن و ھەست دەکەم بەو حاڵەتەیان، دوای پێشوازیکردن و پرسکردن پێیان، ئەو خانووەی ئەو داوای دەکات بۆیان دەخەمە روو دواتر لەگەڵیان دەچم بۆ سەیرکردنی ئەو خانوو یان زەوییە ، پاش گەڕانەوە زۆر بە سەرسامییەوە باس لە سەرکەوتن لە کارەکەم و نەبوونی ھیچ کێشە و گرفتێک بە ھۆی نابیناییەکەمەوە دەکەن و دەستخۆشیم ئاراستە دەکەن".
خاڵە بەکر رۆژانە لە نووسینگەکەی لە گەڕەکی بەختیاری شاری سلێمانی سەرقاڵی زۆری ھەیە و بەردەوام بە سێ ژمارە مۆبایل و تەلەفونێکی نۆرماڵەوە سەرقاڵی وەڵامدانەوەی پەیوەندییەکانە یان بۆ خۆی پەیوەندی دەکات ، بابەتی ھەموو ئەو پەیوەندییانەش تایبەتە بە کڕین و فرۆشتن و بەکرێدانی خانوو یان زەوییەکەوە.
لەنێو نوسینگەکەیدا کلیلی دەیان خانوو داندراوە، ئەو تەنھا بەدەستلێدان و گەڕان بەناو کلیلەکاندا دەزانێت ھەر کلیلێک ھی چ خانوویەکە و لە چ ناوچەیەکە، بەردەوام لە چوونە سەر خانوو زەوییەکانیشدا ئەو چاوساغی کڕیار و شۆفێرەکانە و بە ئاسانی ناونیشانی خانووەکان دەدات و تەنھا یەک جار ناونیشان و شوێنی خانوو زەوییەکان لە مێشکیدا تۆمار دەکات و دواتر زۆر بەئاسانی بە بیری دێتەوە.
ئەو باس لەوەش دەکات، ئێستا لەنێو نووسینگەکانی کڕین و فرۆشتنی خانووبەرە لە سلێمانی ناوبانگێکی دیاری ھەیە و رۆژانە سێ ھێندەی نووسینگەکانی تر کڕیار و فرۆشیار سەردانی دەکەن بۆ کڕین و فرۆشتنی خانوو یان زەوی و بەکرێدانی.
دوای گۆڕانکاری لە سیستمی مووچە و ھەڵگرتنی پاشەکەوتی مووچە و ھەوڵەکانی پێکھێنانی کابینەی نوێی حکوومەتی ھەرێم، بازاڕی خانووبەرە گەشانەوەی بەخۆوە بینیوە و خەڵکێکی زیاتر روو لە کڕینی خانووبەرە دەکەن.
خاڵە بەکر لەو بارەیەوە گوتی: "لە سنووری پارێزگای سلێمانی تا رادەیەک گۆڕانکاری دروستکردووە، بەڵام گۆڕانکارییەکی ھێندە زەق و دیار نییە ، ئەوەی ھەیە بەراورد بە پێنج مانگی رابردوو تا رادەیەک گۆڕانی بەسەر ھاتووە و خەڵکێکی زیاتر سەردانمان دەکەن و نرخەکانیش بەپێی شوێنەکان تا رادەیەک بەرز بووەتەوە".
خاڵە بەکر جگە لە ھەڵکشانی تەمەن و سەرقاڵی کاری رۆژانەی بە کڕین و فرۆشتنی خانوبەرەوە، بەڵام گرنگی زۆر بە ژیانی تایبەتی خۆی و خێزانەکەشی دەدات و ھەوڵ دەدات لە پۆشینی جلوبەرگ و سیمایدا بە جوانی دەربکەوێت، ھەروەھا رۆژانە سەردانی ھۆڵی لەشجوانی دەکات و بۆ تەندروستی و جەستەیەکی رێک وەرزش دەکات.
لە بواری پەیوەندی و تۆڕە کۆمەڵایەتییەکان شارەزایی باشی ھەیە و بۆ خۆی رۆژانە کاری مۆبایل و بەکارھێنانی فەیسبوک و فایبەر و ئاڵوگۆڕی وێنە ئەنجام دەدات.
