عێراق ھاوردەکردنی خورمای قەدەغەکرد

بەغدا ـ AA

وەزارەتی کشتوکاڵی عێراق ئەمڕۆ پێنجشەممە بڕیاری قەدەغەکردنی ھاوردەکردنی خورمای راگەیاند، ئەوەش وەک ھاوکارییەک بۆ جووتیارانی ناوخۆ و ساغکردنەوەی بەرھەمەکانیان لە بازاڕدا.

وەزیری کشتوکاڵی عێراق، ساڵح حەسەنی لە لێدوانێکی رۆژنامەوانییدا لە پەراوێزی سەردانێکی بۆ پارێزگای کەربەلا رایگەیاند، "قەدەغەکردنی ھاوردەکردنی خورما رادەگەیەنین، ئەوەش بۆ ساغکردنەوەی بەرھەمی ناوخۆ و گەیاندنی بە تەواوی بازاڕەکانی وڵات".

ساڵح حەسەنی ئاماژەی بەوەش کرد، ھۆکاری بڕیارەکە بۆ پشتیوانیکردنە لە بەرھەمی ناوخۆیی و جووتیاران.

بڕیارەکەی وەزارەتی کشتوکاڵی عێراق دوای ئەوە دێت کە لە میانی ئەم چەند ھەفتەیەی رابردوودا کە سەرەتای وەرزی پێگەیشتنی خورمایە، بازاڕەکانی عێراق بڕێکی زۆر خورمایان تیادا بوو.