كۆنگره‌ی رۆژنامه‌وانیی نێچیرڤان بارزانی

هه‌ولێر - AA
سه‌رۆكی ئه‌نجوومه‌نی وه‌زیرانی هه‌رێمی كوردستان، نێچیرڤان بارزانی رایگه‌یاند، یاسای بوودجه‌ی ئه‌مساڵی عێراق له‌ یاسای بوودجه‌ی ساڵانی پێشووتر باشتره‌.
ئه‌مرۆ یه‌كشه‌ممه‌ ئه‌نجوومه‌نی وه‌زیرانی هه‌رێمی كوردستان كۆبوونه‌وه‌یه‌كی تایبه‌تی به‌ پرسی بوودجه‌ی گشتی عێراق بۆ ساڵی 2019 سازكرد كه‌ هه‌فته‌ی رابردوو له‌ لایه‌ن ئه‌نجوومه‌نی نوێنه‌رانی عێراقه‌وه‌ په‌سه‌ندكرا و سه‌رۆكی ئه‌نجوومه‌نی وه‌زیرانی هه‌رێمی كوردستان، نێچیرڤان بارزانی له‌ دوای كۆبوونه‌وه‌كه‌ كۆنگره‌یه‌كی رۆژنامه‌وانیی سازكرد و تیایدا تیشكی خسته‌ سه‌ر چه‌ندین پرسی دیكه‌ سه‌رباری پرسی بوودجه‌ی عێراق.
نێچیرڤان بارزانی له‌ سه‌ره‌تای كۆنگره‌ رۆژنامه‌وانییه‌كه‌یدا رایگه‌یاند "ئه‌مڕۆ كۆبوونه‌وه‌ی ئه‌نجوومه‌نی وه‌زیرانمان هه‌بوو، هه‌ڵسه‌نگاندنی خۆمان هه‌بوو بۆ په‌سه‌ندكردنی یاسای بوودجه‌ی گشتی عێراق بۆ 2019 له‌ په‌رله‌مانی عێراقدا، هه‌روه‌كو پێشتر سیاسه‌تی حكوومه‌تی هه‌رێمی كوردستان ئه‌وه‌بووه‌ هه‌وڵی جیددی بدات بۆ چاره‌سه‌ركردنی ئه‌و كێشانه‌ی كه‌ چی له‌ رووی ئه‌منی و چی له‌ رووی سه‌ربازی و چی پرسی بوودجه‌ بێت یان مه‌سه‌له‌ی نه‌وت بێت هه‌موو ئه‌و كێشانه‌ له‌ چوارچێوه‌ی ده‌ستووری عێراق چاره‌سه‌ر بكرێت و ئه‌وه‌ش به‌ دیالۆگ و گفتوگۆ بێت، خۆشحاڵیین كه‌ له‌و چوارچێوه‌شدا هه‌نگاوی باشمان بڕیوه‌ چی له‌ رووی سه‌ربازییه‌وه‌ كۆبوونه‌وه‌كانی ئێمه‌ له‌گه‌ڵ به‌غدا به‌رده‌وامن و هه‌ردوولامان دوژمنی هاوبه‌شمان هه‌یه‌ كه‌ داعشه‌ كه‌ مه‌ترسی سه‌رهه‌ڵدانه‌وه‌ی داعش هه‌ستی پێده‌كرێت به‌تایبه‌ت له‌ ناوچه‌كانی دیاله‌ و مووسڵ و كه‌ركووك، هه‌روه‌ها هه‌ماهه‌نگیی باش هه‌یه‌ له‌ ئاڵوگۆڕی زانیارییه‌كان له‌ نێوان هه‌رێم و به‌غدا، ئه‌مانه‌ هه‌مووی ئه‌و هه‌نگاوانه‌ن كه‌ سیاسه‌تی هه‌رێمی كوردستان و هه‌ر واش بووه‌ له‌ چوارچێوه‌ی ده‌ستووردا كێشه‌كان له‌گه‌ڵ به‌غدا چاره‌سه‌ر بكات".
سه‌رۆكی ئه‌نجوومه‌نی وه‌زیرانی هه‌رێمی كوردستان، نێچیرڤان بارزانی له‌ كۆنگره‌ رۆژنامه‌وانییه‌كه‌یدا سوپاسی سه‌رۆكوه‌زیرانی عێراق، عادل عه‌بدولمه‌هدی كرد و گوتی: "تێبینییه‌كانی حكوومه‌تی هه‌رێمی كوردستان له‌سه‌ر یاسای بوودجه‌ به‌ گرنگییه‌وه‌ وه‌رگرتووه‌"، هه‌روه‌ها سه‌رۆكی ئه‌نجوومه‌نی وه‌زیرانی هه‌رێمی كوردستان سوپاسی وه‌زاره‌تی دارایی عێراق، وه‌زاره‌تی دارایی هه‌رێم و سكرتێری ئه‌نجوومه‌نی وه‌زیرانی هه‌رێم و فراكسیۆنه‌ كوردستانییه‌كانیشی كرد.
نێچیرڤان بارزانی گوتی: "ئه‌و یاسای بوودجه‌یه‌ی هه‌یه‌ له‌ ساڵانی پێشتر باشتره‌، ره‌نگه‌ وه‌ڵامی هه‌موو تموحه‌كانی ئێمه‌ نه‌داته‌وه‌، به‌ڵام هه‌نگاوێك به‌ره‌و پێشه‌وه‌ رۆیشتووین له‌وه‌ی كێشه‌كانی نێوان هه‌ردوولا چاره‌سه‌ر بكرێت".
ئەو گوتیشی: "هه‌موو لایه‌نه‌كان ئه‌وه‌ی پێیانكرا كردییان، ئه‌وه‌ی دڵی خۆشیكردم هه‌ڵوێستی هه‌موو فراكسیۆنه‌كانی كوردستانی بوو له‌ به‌غدا كه‌ پێكه‌وه‌ به‌رگرییان له‌ ده‌سته‌كه‌وته‌كانی هه‌رێمی كوردستان كرد و سوپاسی یه‌ك به‌ یه‌كەیان ده‌كه‌م كه‌ وه‌كو تیم پێكه‌وه‌ كاریان كرد بۆ ئه‌وه‌ی مافه‌كانی هه‌رێم له‌و یاسایه‌دا جێگیر بكرێت".
سه‌رۆكی ئه‌نجوومه‌نی وه‌زیرانی هه‌رێمی كوردستان هه‌ر سه‌باره‌ت به‌ پرسی بوودجه‌ی عێراق گوتی: "به‌ شێوه‌یه‌كی گشتی ئه‌و یاسای بوودجه‌یه‌ی 2019 به‌راورد به‌ یاساكانی پێشوو بۆ هه‌رێمی كوردستان باشتره‌، حكوومه‌تی هه‌رێمی كوردستان ده‌یه‌وێت پشتگیریی ته‌واوی خۆی بۆ كابینه‌ی عادل عه‌بدولمه‌هدی دووپات بكاته‌وه‌ بۆ ئه‌وه‌ی جه‌خت له‌وه‌ بكاته‌وه‌ كه‌ حكوومه‌تی هه‌رێم ده‌یه‌وێت له‌ چوارچێوه‌ی ده‌ستووری به‌غدا كێشه‌كان چاره‌سه‌ر بكات".
سه‌رۆكی ئه‌نجوومه‌نی وه‌زیرانی هه‌رێمی كوردستان، نێجیرڤان بارزانی سوپاسی مووچه‌خۆران و به‌ڵێنده‌ران و خانه‌نشینان و سه‌رجه‌م چینه‌كانی دیكه‌شی كرد كه‌ "خۆڕاگر" بوون و تێگه‌یشتنیان هه‌بووه‌ بۆ بارودۆخی هه‌رێم و گوتی: "ئه‌گه‌ر داهاتی زیاترمان هه‌بێت ئه‌وله‌وییه‌تی یه‌كه‌می ئێمه‌ هه‌ڵگرتنی پاشه‌كه‌وتی مووچه‌یه‌".
نێچیرڤان بارزانی له‌درێژه‌ی قسه‌كانیدا له‌ كۆنگره‌ رۆژنامه‌وانییه‌كه‌دا تیشكی خسته‌ سه‌ر رووداوه‌كانی دوێنێ شه‌ممه‌ كه‌ له‌ ده‌ڤه‌ری شێلادزێ روویاندا و له‌مباره‌یه‌وه‌ رایگه‌یاند "دوێنێ له‌ شیلادزێ شتێكی ناخۆش روویدا، من ده‌مه‌وێت هاوخه‌می و هاوسۆزی خۆم بۆ برینداره‌كان و ئه‌و كه‌سانه‌ی بوون به‌ قوربانی بۆ خانه‌واده‌كانیان ده‌رده‌بڕم و سه‌ره‌خۆشییان لێ بكه‌م، ئه‌وه‌ی روویدا ناخۆش بوو، به‌ڵام ده‌مه‌وێت جه‌خت له‌سه‌ر ئه‌وه‌ بكه‌مه‌وه‌ كه‌ سیاسه‌تی ئێمه‌ له‌ حكوومه‌تی هه‌رێمی كوردستان ئه‌وه‌یه‌؛ نامانه‌وێت خاكی هه‌رێمی كوردستان به‌هیچ شێوه‌یه‌ك بۆ دژایه‌تیكردنی دراوسێیەكانمان به‌كاربهێندرێت، ئه‌و هۆكارانه‌ی ده‌بنه‌ هۆی ئه‌وه‌ی ئه‌و كاره‌ستانه‌ رووبدات ئه‌وه‌یه‌ به‌داخه‌وه‌ هه‌ندێك حزب سوود له‌ خاكی هه‌رێمی كوردستان وه‌رده‌گرن بۆ ئه‌وه‌ی كێشه‌ بۆ وڵاتانی دراوسێ دروست بكه‌ن، ئه‌مه‌ به‌نسبه‌ت ئێمه‌ له‌ حكوومه‌تی هه‌رێم به‌هیچ شێوه‌یه‌ك قابیلی قبوڵ نییه‌، راسته‌ خۆپیشاندان مافه‌ و به‌یاسا رێكخراوه‌، به‌ڵام خۆپیشاندانێك به‌ شێوه‌یه‌كی ئارام و ئاشتییانه‌ بێت، به‌ڵام كه‌ هه‌وڵ ده‌درێت رێڕه‌وه‌كه‌ی بگۆڕدرێت به‌ شێوه‌یه‌ك توندوتیژی لێ بكه‌وێته‌وه‌ ئه‌مه‌ بۆ ئێمه‌ له‌ حكوومه‌تی هه‌رێم به‌هیچ شێوه‌یه‌ك قبوڵی ناكه‌ین، ئێمه‌ له‌سه‌ر ئه‌م مه‌سه‌له‌یه‌ لێژنه‌یه‌كی لێكۆڵینه‌وه‌ پێكده‌هێنین و زۆر به‌جیدییش له‌سه‌ر ئه‌م بابه‌ته‌ راده‌وه‌ستین بۆ ئه‌وه‌ی جارێكی دیكه‌ ئه‌م بابه‌ته‌ دووباره‌ نه‌بێته‌وه‌".
له‌ وه‌ڵامی پرسیاری رۆژنامه‌وانانیشدا هه‌ر سه‌باره‌ت به‌ پرسی بوودجه‌ سه‌رۆكی ئه‌نجوومه‌نی وه‌زیرانی هه‌رێمی كوردستان، نێچیرڤان بارزانی سه‌باره‌ت به‌ پابه‌ندبوونی هه‌رێم به‌ ناردنی بڕی 250 هه‌زار به‌رمیل نه‌وت له‌ رۆژێكدا به‌ رۆژنامه‌نووسانی راگه‌یاند "كێشه‌كانی هه‌رێمی كوردستان له‌ پرسی نه‌وت له‌گه‌ڵ به‌غدا كێشه‌ی زۆرن، به‌ڵام به‌جێبه‌جێكردنی یاسای بوودجه‌ كه‌ ئێستا هه‌یه‌ یه‌ك ساڵ كاتمان ده‌بێت بۆ ئه‌وه‌ی له‌گه‌ڵ به‌غدا بكه‌وینه‌ گفتوگۆ بۆ ئه‌وه‌ی سه‌رجه‌م كێشه‌كان چاره‌سه‌ر بكه‌ین، ئێمه‌ كێشه‌ی جیددییمان هه‌یه‌، حكوومه‌تی عێراق له‌ ساڵی 2014ه‌وه‌ یه‌كلایه‌نه‌ بوودجه‌ی هه‌رێمی بڕیوه‌، ئێمه‌ مه‌جبووربووین نه‌وت بفرۆشین و ئه‌گه‌ر حكوومه‌تی عێراق پابه‌ندی ناردنی بوودجه‌ با ئێمه‌ ئه‌وه‌مان نه‌ده‌كرد".
گوتیشی: "ئه‌وه‌ی گرنگه‌ ئه‌وه‌یه‌ هه‌ردوولامان دابنیشین و هه‌موو دۆسییه‌كان هه‌ڵبده‌ینه‌وه‌ بۆ ئه‌وه‌ی له‌و ساڵه‌دا كێشه‌كان چاره‌سه‌ر بكه‌ین، من ئه‌و نیازه‌ له‌ عادل عه‌بدولمه‌هدی ده‌بینم كه‌ ده‌یه‌وێت كێشه‌كان چاره‌سه‌ر بكرێن و وه‌كو هه‌رێم ئه‌و ده‌رفه‌ته‌ له‌ كیس ناده‌ین بۆ ئه‌وه‌ی كێشه‌كان چاره‌سه‌ر بكه‌ین".
سه‌رۆكی ئه‌نجوومه‌نی وه‌زیرانی هه‌رێمی كوردستان له‌باره‌ی بوونی گه‌ره‌نتی جێبه‌جێبوونی یاسای بوودجه‌ گوتی: "ده‌مه‌وێت زۆر راستگۆیانه‌ له‌گه‌ڵ خه‌ڵك قسه‌ بكه‌م، ئه‌گه‌ر ئه‌مڕۆ دڵنیابام ئه‌و پاره‌یه‌ی دیاریكراوه‌ دێت و به‌و شێوه‌یه‌ی رێككه‌وتووین له‌سه‌ری بێت ئه‌وا ئه‌مڕۆ رامده‌گه‌یاند پاشه‌كه‌وتی مووچه‌مان هه‌ڵگرت، به‌ڵام هێشتا چه‌ند هه‌نگاوێك ماوه‌، ئێمه‌ و به‌غدا ده‌رسمان وه‌رگرتووه‌ بۆ ئه‌وه‌ی تێبگه‌ین كێشه‌كان ته‌نها به‌دیالۆگ و له‌ چوارچێوه‌ی ده‌ستووردا چاره‌سه‌ر ده‌كرێن".گوتیشی: "ئه‌گه‌ر به‌غدا ده‌یه‌وێت كورد خۆی به‌هاووڵاتی عێراقی بزانێت ده‌بێت كێشه‌كان چاره‌سه‌ر بكات".
سه‌رۆكی ئه‌نجوومه‌نی وه‌زیرانی هه‌رێمی كوردستان، نێچیرڤان بارزانی بۆ ده‌زگاكانی راگه‌یاندن كه‌ ئاژانسی ئانادۆڵوش له‌وێ ئاماده‌ی گواستنه‌وه‌ی كۆنگره‌كه‌ بوو سه‌باره‌ت به‌ پێكهێنانی كابینه‌ی نوێی حكوومه‌تی هه‌رێم رایگه‌یاند "شتی ناسروشتی له‌ ئارادا نییه‌، سه‌رقاڵی دروستكردنیی كابینه‌ی نوێین، گفتوگۆی جیددی له‌ نێوان یه‌كێتی و پارتی، پارتی و گۆڕان هه‌یه‌، رۆژی سێشه‌ممه‌ش دیسانه‌وه‌ كۆبوونه‌وه‌ی دیكه‌ ده‌كرێت و هه‌نگاوه‌ كرده‌ییه‌كان بۆ پێكهێنانی كابینه‌ی نوێی حكوومه‌ت له‌ ئارادا هه‌یه‌".
هه‌ر سه‌باره‌ت به‌ پرسی رووداوه‌كانی رۆژی شه‌ممه‌ی رابردووی ناحیه‌ی شێلادزێ نێچیرڤان بارزانی گوتی: "له‌م ماوه‌یه‌دا زۆر به‌داخه‌وه‌ هه‌ندێك هاووڵاتی شه‌هیدبوون له‌ ئه‌نجامی بۆردومانی فڕۆكه‌كانی توركیا، به‌ڵام پرسیاره‌كه‌ ئه‌وه‌یه‌ ئه‌و بۆردومانه‌ له‌ گونده‌كان كرا؟، نه‌خێر، به‌ڵكو له‌و ناوچانه‌ كرا كه‌ په‌كه‌كه‌ بوونی هه‌یه‌ و له‌ ئه‌نجامی بوونی په‌كه‌كه‌ ئه‌و بۆردومانانه‌ ده‌كرێت، واته‌ هۆیه‌ك هه‌یه‌، وه‌ڵامی ئه‌وه‌؛ ئه‌وه‌ نییه‌ هێرش بكه‌یته‌ سه‌ر سه‌ربازگه‌ی توركیا له‌و سنوورانه‌، ئه‌وان ده‌بێت له‌گه‌ڵ حكوومه‌تی هه‌رێمی كوردستان قسه‌ بكه‌ن، ئه‌و هۆكارانه‌ی ده‌بنه‌ هۆی ئه‌و كێشانه‌ ئه‌وه‌ چاره‌سه‌ر بكه‌ین، هیچ بیانوویه‌ك بۆ بۆردومانەکانی توركیا نابێت، ئیداره‌ی ناوچه‌كه‌ش به‌ خه‌ڵكی ناوچه‌كه‌یان گوتووه‌ كه‌ نابێت له‌و شریته‌ سنوورییه‌ی هه‌یه‌ زیاتر بڕۆن، چونكه‌ ئه‌گه‌ری ئه‌و بۆردومانانه‌ هه‌یه‌، ئه‌مه‌ جه‌خت كراوه‌ته‌وه‌ بۆ هاووڵاتییان و هه‌ندێك جار پابەندی ئه‌و رێنماییانه‌ نابن و ئه‌و شتانه‌ی لێ ده‌كه‌وێته‌وه‌، ئێمه‌ له‌گه‌ڵ توركیاش به‌رده‌وام ده‌بین كه‌ ئه‌و شتانه‌ نه‌بێت، به‌ڵام هۆكاره‌كه‌ روونه‌، هۆكاره‌كه‌ بوونی په‌كه‌كه‌یه‌".
له‌ وه‌ڵامی پرسیاری ئاژانسی ئانادۆڵو سه‌باره‌ت به‌ ئه‌گه‌ری سه‌رهه‌ڵدانه‌وه‌ی داعش و بوونی ئه‌و مه‌ترسییه‌، سه‌رۆكی ئه‌نجوومه‌نی وه‌زیرانی هه‌رێمی كوردستان گوتی: "داعش دوژمنی هه‌موو لایه‌كمانه‌، دوژمنی به‌غدایه‌، هی هه‌ولێره‌، هی وڵاتانی دیكه‌شه‌، له‌مڕووه‌وه‌ هه‌رێمی كوردستان هه‌ماهه‌نگییمان له‌گه‌ڵ به‌غدا له‌ رووی زانیارییه‌وه‌ زۆر باشتره‌ له‌ رووی جێبه‌جێكردنی پرسی ئه‌منی له‌و ناوچه‌یه‌ی داعشی لێیه‌ زیاتره‌، داعش به‌ ئه‌ركی هه‌موو لایه‌ك و به‌ خوێنی شه‌هیدانی پێشمه‌رگه‌ و سوپای عێراق و حه‌شدی شه‌عبی و پۆلیسی عێراق و پاڵپشتیی نێوده‌وڵه‌تی و لایه‌نه‌كانی دیكه‌ش مه‌ترسییه‌كه‌ی كه‌م بووه‌ته‌وه‌، به‌ڵام داعش كۆتایی پێنه‌هاتووه‌".
سه‌باره‌ت به‌ بوونی هێزه‌كانی ئه‌مریكا له‌ عێراق و كشانه‌وه‌ی هێزه‌كانی ئه‌مریكا له‌ سووریا بۆ عێراق، سه‌رۆكی ئه‌نجوومه‌نی وه‌زیرانی هه‌رێمی كوردستان، نێچیرڤان بارزانی له‌ وه‌ڵامی ئاژانسی ئانادۆڵو گوتی: "تا مه‌ترسی داعش له‌م وڵاته‌ هه‌بێت كه‌ ئێستا ئه‌م مه‌ترسییه‌ هه‌یه‌ و جیددیشه‌ ئه‌وا هێزه‌كانی ئه‌مریكا پێویسته‌ بۆ یارمه‌تیدانی هێزه‌كانی عێراق و له‌ چوارچێوه‌ی به‌رژه‌وه‌ندیی عێراق له‌م وڵاته‌ بمێننه‌وه‌، ئه‌مه‌ بۆچوونی حكوومه‌تی هه‌رێمی كوردستانه‌، چونكه‌ ئه‌گه‌ر خوا نه‌یكات داعش جارێكی دیكه‌ سه‌رهه‌ڵبداته‌وه‌ كێشه‌یه‌كی گه‌وره‌ ده‌بێت، بیرمان نه‌چێت داعش تا ده‌روازه‌ی به‌غدا و سنووری هه‌ولێر هاتن، ئه‌وه‌ی نه‌یهێشت داعش زیاتر بێت ئه‌وا ئه‌و یارمه‌تییه‌ نێوده‌وڵه‌تییه‌ بوو كه‌ هێزه‌كانی هاوپه‌یمانان و له‌سه‌رووی هه‌موویانه‌وه‌ ئه‌مریكا بوو، بۆیه‌ ئه‌مڕۆش ئه‌و مه‌ترسییه‌ی داعش هێشتا هه‌یه‌، تا ئه‌و كاته‌ی ئه‌و مه‌ترسییه‌ هه‌بێت عێراق پێویستی به‌وه‌ هه‌یه‌ هێزه‌كانی هاوپه‌یمانان بمێننه‌وه‌، سه‌باره‌ت به‌ هاتنی سه‌ربازانی ئه‌مریكا بۆ هه‌رێمی كوردستان تا ئێستا هیچ سه‌ربازێكی ئه‌مریكا له‌ سووریاوه‌ نه‌هاتووه‌ته‌ هه‌رێمی كوردستان".
نێچیرڤان بارزانی له‌ درێژەی قسه‌كانیدا سه‌باره‌ت به‌ په‌یوه‌ندییه‌ ته‌له‌فۆنییه‌كه‌ی دوێنێیدا له‌گه‌ڵ وه‌زیری ده‌ره‌وه‌ی توركیا، مه‌ولود چاوشئۆغڵو گوتی: "به‌ڵێ دوێنێ ئه‌و په‌یوه‌ندییه‌ ته‌له‌فۆنییه‌ له‌گه‌ڵ وه‌زیری ده‌ره‌وه‌ی توركیا روویدا و بابه‌تی په‌یوه‌ندییه‌كه‌ش مه‌سه‌له‌كه‌ی دوێنێی شێلادزێ بوو، ئێمه‌ جه‌ختمان له‌وه‌كردووه‌ كه‌ هه‌موو رێوشوێنێكی یاسایی ده‌گرێته‌ به‌ر بۆ دادگاییكردنی هه‌ر كه‌سێك كه‌ ویستوویانه‌ ئه‌و خۆپیشاندانانه‌ی كه‌ سه‌ره‌تا به‌هێمنی بووه‌ و دواتر هه‌ندێك كه‌س رێڕه‌وه‌كه‌یان گۆڕیوه‌ و ئه‌و هه‌وڵه‌ ده‌ده‌ین و لێكۆڵینه‌وه‌ش ده‌كه‌ین".
هه‌روه‌ها گوتیشی: "ئێمه‌ وه‌كو حكوومه‌تی هه‌رێمی كوردستان به‌رپرسیارێیه‌تی ئێمه‌ هاووڵاتییانی هه‌رێمی كوردستانی عێراقه‌، هه‌ندێك لایه‌ن بێ ره‌چاوكردنی به‌رژه‌وه‌ندیی هاووڵاتییانی هه‌رێمی كوردستان، بێ ره‌چاوكردنی به‌رژه‌وه‌ندیی حكوومه‌تی هه‌رێمی كوردستان خاكی هه‌رێمی كوردستان به‌كارده‌هێنن بۆ زیان گه‌یاندن بە وڵاتانی دراوسێ، ئه‌مه‌ له‌ هیچ وڵات و لۆجیكێك ئه‌مه‌ قبوڵكراو نییه‌، ماقوڵ نییه‌ خاكی هه‌رێمی كوردستان به‌كاربهێنیت و خۆی به‌كاربهێنیت و بچیت و كێشه‌ بۆ وڵاتانی دراوسێ دروست بكه‌یت و ئێمه‌ باجه‌كه‌ی بده‌ین كه‌ نه‌ تێیدا به‌شداریین و نه‌ ده‌مانه‌وێت به‌شداربیین تێیدا، ناكرێت خاكی هه‌رێمی كوردستان بۆ دژایه‌تیكردنی دراوسێیه‌كانمان به‌كاربهێندرێت، به‌داخه‌وه‌ هه‌ندێك سوودییان له‌و چوار ساڵه‌ بینی كه‌ ئێمه‌ سه‌رقاڵی شه‌ڕی داعش بووین و هه‌ندێك شت كراوه‌ كه‌ سوودیان له‌و ده‌رفه‌ته‌ كرد و كێشه‌یان بۆ هه‌رێمی كوردستان دروست كرد".
سه‌رۆكی ئه‌نجوومه‌نی وه‌زیرانی هه‌رێمی كوردستان ئه‌وه‌شی گوت "زۆر دڵگرانیین كه‌ هاووڵاتییانی ئێمه‌ ده‌بنه‌ ئامانج و شه‌هید ده‌بن، به‌ڵام ئه‌وه‌ بۆ روویداوه‌؟ ئه‌وه‌ له‌ ناوچه‌یه‌ك روویدا كه‌ ئیداره‌ی ناوچه‌كه‌ به‌ خه‌ڵكی ئه‌و ناوچه‌یه‌یان گوتووه‌ كه‌ نابێت له‌و ناوچه‌یه‌ تێپه‌ڕێن، چونكه‌ ئه‌گه‌ری هه‌یه‌ بۆردومان بكرێن، چونكه‌ په‌كه‌كه‌ له‌وێ هه‌یه‌، چونكه‌ په‌كه‌كه‌ ئه‌و شوێنانه‌ به‌كارده‌هێنێت بۆ ئه‌وه‌ی بچنه‌ توركیا و زیان به‌ توركیا بگه‌یه‌نن و باجه‌كه‌ی ئێمه‌ بیده‌ین".
سه‌رۆكی ئه‌نجوومه‌نی وه‌زیرانی هه‌رێمی كوردستان، نێچیرڤان بارزانی سه‌باره‌ت په‌یوه‌ندیی له‌گه‌ڵ سه‌ركۆماری عێراق، به‌رهه‌م ساڵح گوتی: "پێشتر كێشه‌یه‌ك هه‌بووه‌، به‌ڵام كێشه‌كه‌مان له‌گه‌ڵ كه‌س نه‌بووه‌، به‌ڵكو میكانیزمی هه‌ڵبژاردنی سه‌رۆك كۆمارمان پێ باش نه‌بووه‌، ئێمه‌ پێمان باش بوو سه‌رۆك كۆمار له‌ چوارچێوه‌ی فراكسیۆنه‌ كوردستانییه‌كان هه‌ڵبژێردرێت نه‌وه‌ك له‌ ده‌ره‌وه‌ی ئه‌مه‌، ئێمه‌ پێمان باش بوو ئه‌مه‌ هه‌بێت و هه‌ركه‌س بردییه‌وه‌ كاندید بێت بۆ ئه‌وه‌ی ببێته‌ سه‌رۆك كۆمار، ئێمه‌ كێشه‌ی كه‌سییمان له‌گه‌ڵ به‌رهه‌م ساڵح نییه‌".