پوتین "دڵگرانە" بە ئاماژەنەکردنی ناوی لە راپۆرتی ئەمریکا لەبارەی کرملین

مۆسکۆ - AA

سەرۆکی رووسیا، ڤلادیمیر پوتین رایگەیاند کە ئاماژەنەکردن بە ناوی لە راپۆرتی کرملین کە لە لایەن ئەمریکاوە بڵاوکراوەتەوە دڵگرانی کردووە و گوتی: "پێویستە رووسیا لە پرسەکانی ناوخۆی خۆی چڕبێتەوە".

پوتین لە گوتارێکیدا لە چالاکییەک لە مۆسکۆی پایتەختی رووسیا ھەڵسەنگاندنی لەبارەی راپۆرتی وەزارەتی گەنجینەی ئەمریکا کرد کە پێشکەش بە کۆنگرێسی ئەمریکا دەکرێت و پێشنیار دەکات ژمارەیەک بەرپرسی باڵا، سەرمایەدار و کەسانی نزیک لە کرملین بخرێتە نێو لیستی رەشەوە.

سەرۆکی رووسیا ئاماژەی بەوە دا کە راپۆرتەکەی ئەمریکا ھەنگاوێکی دوژمنانەیە و گوتیشی: "ئەوانەی راپۆرتەکەیان ئامادە کردووە دەیانەوێت پەیوەندی مۆسکۆ-واشنتۆن تێک بدەن و زیان بە حکوومەتەکانی خۆیان بدەن".

ڤلادیمیر پوتین روونیشی کردەوە کە بەھۆی راپۆرتەکەوە، رووسیا لە ھەنگاوی ھاوبەرامبەر دووردەکەوێتەوە و گوتیشی: "دڵگرانم بەوەی ئاماژە بە ناوم نەکراوە لە راپۆرتەکەدا".

پوتین دەستەواژەی " کاروان دەڕوا و سەگ دەوەڕێت"ی بەکارھێنا و ھەروەھا گوتی: "پێویستە رووسیا لە پرسەکانی ناوخۆی خۆی چڕبێتەوە".