چاوشئۆغڵو: "ئه‌مریكا ئێستاش دڵنیاییمان ناداتێ بۆ ئه‌وه‌ی پاتریۆتمان پێ بفرۆشێ"

واشنتۆن - AA

وه‌زیری ده‌ره‌وه‌ی توركیا، مه‌ولود چاوشئۆغڵو سه‌باره‌ت به‌ مشتومڕی نێوان توركیا و ئه‌مریكا له‌باره‌ی سیسته‌می ئێس-٤٠٠ه‌وه‌ رایگه‌یاند: "تاكو ئێستا ئه‌مریكا له‌باره‌ی فرۆشتنی پاتریۆته‌وه‌ دڵنیایی نه‌داوینه‌تێ. مادام كێ به‌ ده‌م پێداویستییه‌كانمه‌وه‌ دێت؟ نابێت هه‌ر كه‌سه‌ و به‌ ئاره‌زووی خۆی بڕیار بدات. كێ به‌پیر ره‌وشی ئه‌منیمه‌وه‌ دێت؟".

له‌ میانی كۆبوونه‌وه‌ی وه‌زیرانی ده‌ره‌وه‌ی وڵاتانی ئه‌ندام له‌ ناتۆ به‌بۆنه‌ی ٧٠ه‌مین ساڵوه‌گه‌ڕی دامه‌زراندنی ناتۆ، چاوشئۆغڵو وه‌ڵامی پرسیاری میدیاكارانی وڵاته‌كه‌ی دایه‌وه‌.

وه‌زیری ده‌ره‌وه‌ی توركیا، مه‌ولود چاوشئۆغڵو ئاماژه‌ی به‌وه‌ دا كه‌ لێدوانی جێگری سه‌رۆكی ئه‌مریكا، مایك پێنس كه‌ گوایه‌ توركیا داواكاری ئه‌مریكای ره‌تكردۆته‌وه‌ له‌باره‌ی سیسته‌می پاتریۆت دووره‌ له‌ راستییه‌وه‌ و توركیا هێشتا هه‌ڵسه‌نگاندنی خۆی بۆ داواكارییه‌كه‌ی ئه‌مریكا ده‌كات، گوتی: "ئێس-٤٠٠ بڕاوه‌ته‌وه‌. ئێمه‌ پێویستیمان به‌ سیسته‌می زیاتره‌ و ده‌مانه‌وێت سیسته‌می به‌رگری ئاسمانی و پاتریۆتیش بكڕین، ده‌مانه‌وێت له‌ هاوپه‌یمانمان بكڕین به‌ڵام ئه‌وه‌ پێویستی به‌ دانوستانه. بۆ ئه‌وه‌ی له‌ خاڵێكی هاوبه‌شدا رێك بكه‌وین. تاكو ئێستا ئه‌مریكا له‌باره‌ی فرۆشتنی پاتریۆته‌وه‌ دڵنیایی نه‌داوینه‌تێ. مادام كێ به‌ ده‌م پێداویستییه‌كانمه‌وه‌ دێت؟ نابێت هه‌ر كه‌سه‌ و به‌ ئاره‌زووی خۆی بڕیار بدات. كێ به‌پیر ره‌وشی ئه‌منیمه‌وه‌ دێت؟ ئه‌و سیسته‌مه‌ی من كڕیوومه‌ بۆ ئه‌وه‌ نییه‌ هێرشی پێ بكرێته‌ سه‌ر. ناوی خۆی به‌خۆوه‌یه‌ و سیسته‌می به‌رگری ئاسمانییه‌، بۆ ئه‌وه‌ ئه‌و سیسته‌مه‌ ده‌كڕین كه‌ هێرشێك ئاراسته‌مان ده‌كرێ وڵات، خاك و كایه‌ی ئاسمانیمان بپارێزین".

چاوشئۆغڵو سه‌رنجی بۆ ئه‌وه‌ راكێشا كه‌ ئه‌مریكا بۆ فرۆشتنی پاتریۆت به‌ توركیا پێویستی به‌ ره‌زامه‌ندی به‌ده‌ستهێنانی كۆنگرێسه‌ و گوتی: "له‌مباره‌یه‌وه‌ دڵنیاییمان ناده‌نێ و ره‌زامه‌ندی كۆنگرێسیشیان به‌ده‌ست نه‌هێناوه‌. پێموایه‌ له‌باره‌ی نرخی پاتریۆته‌وه‌ رێك ده‌كه‌وین به‌ڵام پێویسته‌ ئه‌مریكا سه‌ره‌تا له‌ ناو خۆیدا ئه‌و كێشه‌یه‌ چاره‌سه‌ر بكات. ئه‌و پرۆسه‌یه‌كه‌ نزیكه‌ی ١٠ ساڵه‌ به‌رده‌وامه‌. به‌ستنه‌وه‌ی ئه‌مه‌ به‌ ئێس ٤٠٠ه‌وه‌ راست نییه‌. ئێمه‌ به‌هۆی ئه‌وه‌ی پاتریۆتمان پێ نه‌فرۆشرا ناچاربووین ئێس ٤٠٠ بكڕین. ١٠ ساڵه‌ ناتوانین بیكڕین. ئه‌وه‌ كێشه‌یه‌كه‌ ١٠ ساڵه‌ به‌رده‌وامه‌ و ئێمه‌ ئه‌و پێویستیه‌ به‌په‌له‌مان له‌لایه‌ن هاوپه‌یمانێكی وه‌ك ئه‌مریكا بۆ پڕنه‌كرایه‌وه‌".