نێچیرڤان بارزانی: "له‌داهاتوودا ده‌رده‌كه‌وێت كێ داعشی نارده‌ سه‌رمان"

هه‌ولێر - AA

نێچیرڤان بارزانی ده‌ڵێت ده‌یانه‌وێت هه‌رێمی كوردستان بكه‌ن به‌ شاگوڵی رۆژهه‌ڵاتی ناوه‌ڕاست، وای لێ بكه‌ن له‌ تاقیكردنه‌وه‌ی سیاسه‌تدا سه‌ركه‌وتووی یه‌كه‌م بێت.

ئه‌مڕۆ شه‌ممه‌، سه‌رۆكی حكوومه‌تی هه‌رێمی كوردستان نێچیرڤان بارزانی له‌ وتارێكدا له‌ رێوڕه‌سمی خه‌ڵاتكردنی قوتابییه‌ سه‌ركه‌وتووه‌كان له‌ هۆڵی سه‌عد عه‌بدوڵا له‌هه‌ولێر تیشكی خسته‌ سه‌ر چه‌ند بابه‌تێكی رۆژ و باسی داعشیشی كرد، بارزانی له‌وباره‌یه‌وه‌ رایگه‌یاند "ئێمه‌ ته‌نها پیاوی شاخ و خه‌باتی پێشمه‌رگایه‌تی نه‌بووین، به‌ڵكو ئه‌مڕۆ و سبه‌ینێشمان له‌پێش چاوه‌ كه‌ زانست بووه‌ به‌ رێبه‌ر و رێنیشانده‌ری مرۆڤایه‌تی له‌هه‌موو شوێنێكدا، ده‌مانه‌وێت به‌ خوێندن و زانست و هۆشیاری پێشبڕكێ له‌گه‌ڵ ده‌وروبه‌ردا ببه‌ینه‌وه‌، ئه‌وانه‌شی كه‌ دوێنێ توانجی ئه‌وه‌یان لێ ده‌داین و ده‌یانگوت كورد ببن به‌ حكوومه‌تیش ناتوانن خۆیان به‌ڕێوه‌ببه‌ن، به‌ڵام ئێستا ئه‌وانه‌ به‌شێوه‌یه‌ك دواكه‌وتوون و به‌جێماون كه‌ ناتوانن به‌ تۆزی كاروانی كوردستان بگه‌ن".

بارزانی له‌درێژه‌ی قسه‌كانیدا باسی بارودۆخی كوردستانیشی كرد و رایگه‌یاند "ده‌مانه‌وێت هه‌رێمه‌كه‌مان بكه‌ین به‌ شاگوڵی رۆژهه‌ڵاتی ناوه‌ڕاست، ده‌بێت وابكه‌ین هه‌رێمی كوردستان له‌ تاقیكردنه‌وه‌ی سیاسه‌تدا سه‌ركه‌وتووی یه‌كه‌م بێت".

له‌ وتاره‌كه‌یدا بۆ بەشداربووان رێوڕەسمەکە كه‌ زۆرترینییان له‌و كه‌سانه‌ بوون كه‌ له‌ كه‌رتی په‌روه‌رده‌دان، نێچیرڤان بارزانی هه‌روه‌ها گوتیشی "دڵنیابن ئه‌گه‌ر شه‌ڕی داعش نه‌بوایه‌ ئێمه‌ ئێستا له‌هه‌وارێكی دیكه‌ و له‌ قۆناغێكی دیكه‌ هه‌نگاومان ده‌نا، خۆتان باش ده‌زانن كه‌ داعش خه‌نجه‌رێكی نامه‌ردی بوو كه‌ له‌ گه‌لی كوردستان و سه‌ركه‌وتنه‌كانی حكوومه‌تی هه‌رێمی كوردستان درا، ئێمه‌ له‌ به‌رنگاربوونه‌وه‌ی داعش سه‌ری قه‌ڵغان و نووكی نیزه‌كه‌ بووین، داعش ئه‌وه‌نده‌ی گورزی له‌ كوردستاندا دا، هێنده‌ گورزی له‌ هیچ كوێیه‌كی دونیا نه‌داوه‌، خوای گه‌وره‌ له‌داهاتوودا ده‌ریده‌خات كه‌ كێ بوون ئه‌وانه‌ی داعشییان نارده‌ سه‌ر ئێمه‌، به‌ڵام ئێوه‌ بزانن كه‌ گه‌لی كوردستان گوزری نامه‌ردی زۆرتریشی بینیوه‌، ته‌نها له‌به‌ر ئه‌وه‌ی ویستوومانه‌ ژیانێكی شیاو بۆ مرۆڤ لێره‌دا دروست بكه‌ین".