سلێمانی.. فێستیڤاڵی کولتوورە جیاوازەکان

سلێمانی ـ AA

ئەمڕۆ بە بۆنەی رۆژی 1ی ئایار رۆژی کرێکارانی جیھانەوە، رێکخراوی گەشەپێدانی مەدەنییەت CDO ھەستا بە ئەنجامدانی فێستیڤاڵێک بەناوی فێستیڤاڵی کولتوورە جیاوازەکان لە باخی گشتی شاری سلێمانی، تێیدا گرووپی کولتوورە جیاوازەکان لە چەند وڵاتێکی جیاوازی جیھانەوە بەشدارن و کولتووری وڵاتانی خۆیان دەناسێنن.

سەرپەرشتیاری فێستیڤاڵەکە، بەختیار ئەحمەد بۆ ئاژانسی ئانادۆڵو گوتی: "لەم رۆژەدا کە رۆژی کرێکارانی جیھانە وەک رێکخراوەکەمان ھەستاین بە ئەنجامدانی ئەم فێستیڤاڵە کە تێیدا چەندین گرووپی وڵاتانی جیھانی بەشدارن و بەشێکیان بۆ خۆیان کرێکارن و لە سلێمانی کار دەکەن و حەزیان کردووە کولتووری وڵاتەکانی خۆیان پێشکەش بە ئامادەبووانی فێستیڤاڵەکە بکەن".

ئەو گوتی: "گرووپە بەشدارەکان بریتین لە گرووپی کولتووری (بەڕێوەبەرایەتی ھونەر و رۆشنبیری سلێمانی، گرووپی دیالە بە نوێنەرایەتی عێراق، گرووپی کرێکارانی چینی، نیپاڵ، ئێران، سووریا) بەشدارن.

لە فێستیڤاڵەکەدا گرووپی وڵاتە جیاوازەکان بە زمان و کولتووری خۆیانەوە بەرھەمەکانیان پێشکەش بە ئامادەبووانی فێستیڤاڵ کرد.

ئەمڕۆ بەبۆنەی رۆژی جیھانی کرێکارانەوە لە ھەرێمی کوردستان و وڵاتانی جیھان چەندین چالاکی جۆراوجۆر بەڕێوە دەچێت، زۆربەی چالاکییەکانیش داواکاری باشکردنی دۆخ و ژیانی کرێکارانە.