كۆنگره‌ی رۆژنامه‌وانی وه‌زیری به‌رگریی ئه‌ڵمانیا و وه‌زیری پێشمه‌رگه‌

هه‌ولێر-AA

وه‌زیری به‌رگریی ئه‌ڵمانیا به‌سه‌ردانێك گه‌یشته‌ هه‌ولێر و له‌گه‌ڵ به‌رپرسانی هه‌رێم كۆبوویه‌وه‌ و چه‌ندین ته‌وه‌رییان باسكردووه‌.

پاش گه‌یشتنی به‌هه‌ولێر دوێنێ شه‌وی سێشه‌ممه‌ له‌سه‌ر چوارشه‌ممه‌، ئه‌مڕۆ وه‌زیری به‌رگریی ئه‌ڵمانیا ئنگریت كرامپ كارینباوه‌ر چه‌ند سه‌ردان و به‌سه‌ركردنه‌وه‌ی بنكه‌كانی مه‌شق و راهێنان به‌هێزه‌كانی پێشمه‌رگه‌ی ئه‌نجامدا و هێزه‌كانی وڵاته‌كه‌شی به‌سه‌ركرده‌وه‌.

له‌ كۆنگره‌یه‌كی رۆژنامه‌وانیی هاوبه‌شدا له‌گه‌ڵ وه‌زیری پێشمه‌رگه‌ی حكوومه‌تی هه‌رێمی كوردستان شۆڕشی ئیسماعیل باسیان له‌ هۆكاری سه‌ردانه‌كه‌ی وه‌زیره‌ ئه‌ڵمانییه‌كه‌ و چه‌ند پرسێكی دیكه‌ كرد.

له‌و كۆنگره‌ رۆژنامه‌وانییه‌دا سه‌ره‌تا وه‌زیری پێشمه‌رگه‌ شۆڕش ئیسماعیل رایگه‌یاند "ئێمه‌ كۆبوونه‌وه‌یه‌كی زۆر باش و پڕ به‌سوود و به‌رهه‌ممان ئه‌نجامداوه‌، ئه‌ڵمانییه‌كان دۆستی ئێمه‌ن و راوێژكاره‌كانییان له‌ كاتی پێویستدا بۆ پشتیوانی گه‌لی كوردستان و حكوومه‌تی هه‌رێم و پێشمه‌رگه‌ كاری باشیان كرد و رۆڵی به‌رچاوییان هه‌بوو له‌ تێكشكانی داعشدا، بوونی سه‌ربازیی ئه‌ڵمانیا له‌كاتی گونجاودابوو، كاری پێویستییان كرد به‌تایبه‌ت له‌ راهێنانی پێشمه‌رگه‌ و به‌رزكردنه‌وه‌ی توانای سه‌ربازیی ئه‌فسه‌ران و پێشمه‌رگه‌كانی كوردستاندا، هه‌روه‌ها له‌ ناردنی چه‌ك و ته‌قه‌مه‌نی و ره‌نگه‌ ئه‌مه‌ یه‌كه‌مجار بێت ئه‌ڵمانیا بڕیاری مێژووی به‌رامبه‌ر به‌ هه‌رێمی كوردستان دا، هه‌روه‌ها ده‌رمانێكی زۆر و نه‌خۆشخانه‌شیان بۆ كردووینه‌ته‌وه‌ كه‌ له‌ئاینده‌دا خزمه‌ت به‌ هێزه‌كانی پێشمه‌رگه‌ ده‌كات، ئێستا سه‌رقاڵی كردنه‌وه‌ی سه‌نته‌رێكی فێركردنی زمانی ئه‌ڵمانی بكه‌ینه‌وه‌ بۆ ئه‌وه‌ی ئه‌فسه‌رانی ئێمه‌ فێری ئه‌و زمانه‌ ببن و له‌ زانستی سه‌ربازی و ئه‌زموونی زۆری ئه‌ڵمانیا راسته‌وخۆ وه‌ربگرن و باشتر سوودمه‌ند بن".

وه‌زیری پێشمه‌رگه‌ی حكوومه‌تی هه‌رێم هه‌روه‌ها گوتیشی "ئێمه‌ له‌گه‌ڵ ئه‌ڵمانییه‌كان و تیمی راوێژكاره‌كانییاندا پڕۆژه‌یه‌كی ستراتیژیی فراوانمان پێكه‌وه‌ ئاماده‌كردووه‌ و هه‌نگاوی باشمان ناوه‌ و چووینه‌ته‌ پێشه‌وه‌، ئه‌ویش خۆی له‌ رێكخستنه‌وه‌ و به‌هێزكردنه‌وه‌ و به‌رزكردنه‌وه‌ی تواناكانی هێزی پێشمه‌رگه‌ی كوردستاندا ده‌بینێته‌وه‌، تا بتوانیین هێزی پێشمه‌رگه‌ی كوردستان باشتر رێكبخه‌ینه‌وه‌ و سه‌ركردایه‌تیی باشتر بێت و كۆنتڕۆڵی باشتر بێت".

شۆڕش ئیسماعیل هه‌روه‌ها ئه‌وه‌شی گوت "ئه‌گه‌ر ئه‌ڵمانییه‌كان و هاوپه‌یمانان نه‌بوونایه‌ گه‌لی كوردستان به‌هۆی په‌لاماره‌كانی شه‌ڕی داعشه‌وه‌ تووشی نه‌هامه‌تی زۆر ده‌بوونه‌وه‌، دڵخۆشین پێكه‌وه‌ له‌گه‌ڵ ئه‌ڵمانه‌كان و هاوپه‌یمانه‌كانی دیكه‌ماندا پڕۆسه‌ی چاكسازی بگه‌یه‌نینه‌ ئه‌نجامێكی دڵخۆشكه‌ر بۆ هه‌موو لایه‌كمان".

ناوبراو سوپاسی گه‌لی كوردستان و حكوومه‌ت و په‌رله‌مان و سوپای ئه‌ڵمانیای كرد كه‌ به‌ قسه‌ی ئه‌و "پشتیوانی گه‌لی كوردستان" بوون.

وه‌زیری به‌رگریی ئه‌ڵمانیا ئنگریت كرامپ كارینباوه‌ر له‌و كۆنگره‌ رۆژنامه‌وانییه‌دا گوتی "پاش ئه‌وه‌ی هه‌نگاوی سه‌ره‌تای و سه‌ره‌كییمان ئه‌نجامدا، ئێستا له‌ قۆناغی دووه‌مداین له‌رێگه‌ی راهێنه‌رامانه‌وه‌ راهێنان به‌ هێزه‌كانی عێراق و پێشمه‌رگه‌ ده‌كه‌ین و ده‌مانه‌وێت گه‌شه‌ی پێبده‌ین و بگه‌ین به‌ ئاستێكی دیكه‌، ئێمه‌ له‌ به‌سه‌ركردنه‌وه‌ و گفتوگۆ سیاسییه‌كانماندا بینیمان كه‌ چۆن لێره‌ رۆڵی ئه‌ڵمانیا و سوپای ئه‌ڵمانیا به‌رز ده‌نرخێنرێت و ئه‌و یارمه‌تییه‌ مه‌ده‌نییه‌ش ده‌كرێت له‌رێگه‌ی چه‌ندین رێكخراوه‌ به‌رز ده‌نرخێنرێت، ده‌مانه‌وێت هه‌رێمی كوردستان به‌رقه‌رار بێت و له‌م سه‌قامگیرییه‌ی ئێره‌ به‌رده‌وام بین و شانازییه‌ كه‌ ئێمه‌ به‌شێكین له‌و سه‌قامگیرییه‌".

وه‌زیری پێشمه‌رگه‌ له‌ وه‌ڵامی پرسیارێكدا به‌ رۆژنامه‌نووسانی راگه‌یاند "تا ئێستا گوێم لێ نه‌بووه‌ هیچ كه‌سێك بڵێت داعش نه‌ماوه‌، داعش له‌شه‌ڕی رووبه‌ڕووبونه‌وه‌دا تێكشكاوه‌، داعش ئێستا به‌شێوه‌یه‌كی تر خه‌ریكی خۆ ڕێكخستنه‌وه‌یه‌ و مه‌ترسییه‌كانی له‌ پێشتر كه‌متر نییه‌، له‌ ئاینده‌دا ئه‌گه‌ر حكوومه‌تی هه‌رێمی كوردستان له‌گه‌ڵ عێراقدا بگه‌نه‌ رێككه‌وتن بۆ چاره‌سه‌ری كێشه‌كان ئه‌مه‌ بۆ خۆی هه‌نگاوێكی زۆر جیددی ده‌بێت بۆ ئه‌وه‌ی له‌گه‌ڵ عێراقدا پێكه‌وه‌ ئه‌و شوێنانه‌ كۆنتڕۆڵ بكه‌ین كه‌ داعش تێیاندا خه‌ریكی خۆ رێكخستنه‌وه‌، پێموایه‌ شه‌ڕی داعش له‌ ئاینده‌دا شه‌ڕێكی قورستر ده‌بێت، چونكه‌ داعش به‌ربڵاوه‌ و شه‌ڕی رووبه‌ڕووبونه‌وه‌ نییه‌".

وه‌زیری به‌رگریی ئه‌ڵمانیا ئنگریت كرامپ كارینباوه‌ر له‌ وه‌ڵامی پرسیارێكدا گوتی "داعش جیاواز له‌وه‌ی پێشتر ئێستا هه‌یه‌، بۆیه‌ ده‌بێت درێژه‌پێده‌ری كاره‌كانمان بین، چۆن ئێمه‌ له‌م هه‌رێمه‌ ده‌مێنینه‌وه‌؟ ئه‌مه‌ بڕیاری په‌رله‌مانی ئه‌ڵمانییه‌ و ده‌بێت ئه‌وان بڕیار بده‌ن كه‌ ئایا چه‌ندی تر ده‌مێنینه‌وه‌؟".
وه‌زیری پێشمه‌رگه‌ی حكوومه‌تی هه‌رێم له‌درێژه‌ی قسه‌كانیدا له‌و كۆنگره‌ رۆژنامه‌وانییه‌دا گوتی "ئێمه‌ قسه‌مان له‌سه‌ر ئه‌وه‌بوو چیتر زووه‌ بگه‌ینه‌ ئه‌نجامێكی یه‌كلاییكه‌ره‌وه‌ له‌گه‌ڵ عێراق بۆ ئه‌وه‌ی بتوانیین له‌و شه‌ڕه‌ی داعش به‌رنامه‌ی بۆ داناوه‌ پێش به‌ ئه‌نجام گه‌یاندنی به‌رنامه‌كه‌ی شكستی پێبهێنین".

وه‌زیری به‌رگریی ئه‌ڵمانیا ئنگریت كرامپ كارینباوه‌ر سه‌باره‌ت به‌ داعش و رووبه‌ڕووبونه‌وه‌ی ئه‌وه‌شی گوت" ده‌بێت ئێمه‌ سه‌ره‌تا رێگه‌ له‌وه‌ بگرین كه‌ داعش ببێته‌وه‌ ئه‌و هێزه‌ی سه‌ره‌تا كه‌ ناوچه‌یه‌كی زۆری له‌ده‌ستدا بوو، بۆیه‌ ده‌بێت له‌وباره‌یه‌وه‌ قسه‌ بكه‌ین كه‌ تا چه‌ند فشاری هێزه‌ ئه‌منییه‌كان هه‌یه‌، به‌ڵام ده‌بێت ئه‌و شوێنانه‌ نه‌هێڵین كه‌ داعش تێیدایه‌ به‌تایبه‌ت له‌و شوێنانه‌ی كه‌ داعش كاریگه‌ریی له‌سه‌ر خه‌ڵكه‌كه‌ی هه‌یه‌، بۆیه‌ ده‌مانه‌وێت ئه‌و زه‌مینه‌ نه‌بێت كه‌ داعش بتوانێت له‌رێگه‌یه‌وه‌ بگه‌ڕێته‌وه‌".

هه‌روه‌ها سه‌باره‌ت به‌ ناوچه‌ی ئارامیش له‌ باكووری سووریا وه‌زیره‌ ئه‌ڵمانییه‌كه‌ گوتی" بوونی ره‌وشێكی ئارام و ئاسایش له‌ سووریا گرنگه‌ بۆ ئه‌وه‌ی ره‌وشێكی سه‌قامگیر له‌ عێراق و هه‌رێمی كوردستانیش هه‌بێت، بۆیه‌ به‌وردی چاودێری ره‌وشی سووریا و ئه‌و پڕۆسه‌یه‌ش ده‌كه‌ین كه‌ كاریگه‌ریی له‌سه‌ر ئاسایشی عێراقیش ده‌بێت ده‌كه‌ین".
سه‌باره‌ت به‌ به‌رنامه‌ی چاكسازیی هێزه‌كانی پێشمه‌رگه‌ش گوتی "بێگومان هه‌موو هێزه‌كان رێكده‌خرێنه‌وه‌ له‌نێویاندا هێزه‌كانی حه‌فتا و هه‌شتاش".

سه‌باره‌ت به‌ گفتوگۆكان له‌گه‌ڵ به‌غداش شۆڕش ئیسماعیل رایگه‌یاند "حكوومه‌تی هه‌رێم ئیراده‌یه‌كی به‌هێزی هه‌یه‌ بۆ ئه‌وه‌ی له‌گه‌ڵ عێراقدا رێكبكه‌وین، ئێمه‌ داوامان له‌ هاوپه‌یمانانمان كردووه‌ بۆ ئه‌وه‌ی زووتر له‌گه‌ڵ عێراق بگه‌ینه‌ چاره‌سه‌ر و زووتر دۆزینه‌وه‌ی چاره‌سه‌ر بۆ ئه‌و كێشانه‌ ده‌كات كه‌ كێشه‌ی داعش زووتر چاره‌سه‌ر بكرێت".
جێی ئاماژه‌یه‌ راگه‌یاندنه‌كانی ئه‌ڵمانیا باسییان له‌وه‌كردووه‌ كه‌ یه‌كێك له‌ هۆكاره‌ سه‌ره‌كییه‌كانی سه‌ردانه‌كه‌ی وه‌زیری به‌رگریی ئه‌ڵمانیا رێگریكردنه‌ له‌ جێبه‌جێكردنی بڕیاری له‌سێداره‌دان بۆ ژماره‌یه‌ك چه‌كداری داعشی به‌ڕه‌گه‌ز ئه‌ڵمانی كه‌ له‌ ریزه‌كانی داعش بوون و ئێستا له‌عێراق ده‌ستگیر كراون.