وەزارەتی ناوخۆی عێراق شەش تیرۆریستی داعشی دەستگیرکرد

بەغدا ــ AA

ئاژانسی هەواڵگریی سەربە وەزارەتی ناوخۆی عێراق رایگەیاند كە شەش تیرۆریستی داعش لە سنووری پارێزگای سەڵاحەددین باكووری عێراق، دەستگیركراون.

لە راگەیەندراوێكدا ئاژانسی هەواڵگریی سەربە وەزارەتی ناوخۆی عێراق بڵاوی كردەوە كە هێزەكانیان پشت بەستن بە زانیارییەكانی هەواڵگریی و لە میانی ئۆپەراسیۆنێكدا، شەش تیرۆریستی داعشیان لە ژمارەیەك ناوچەی سنووری پارێزگای سەڵاحەددین دەستگیركردووە.

بەپێی راگەیەندراوەكە، ئەو دەستگیركراوانە، پێشتر لە سنووری پارێزگای كەركووكەوە بەرەو ناوچەكانی سنووری پارێزگای سەڵاحەددین هەڵاتبوون.

لە راگەیەندراوەكەدا باس لەوە كراوە، تیرۆریستە دەستگیركراوەكان دانیان بەوەداناوە كە بەشدارییان لە چەندین كردەی تیرۆریستی دژبە هێزە ئەمنییەكان و هاووڵاتییان لە ناوچەكانی پارێزگای سەڵاحەددین، كردووە.

لە كۆتایی راگەیەندراوەكەدا ئاماژە بەوە دراوە كە تیرۆریستییەكان دوای وەرگرتنی گوتەكانیان، بە مەبەستی تەواوكردنی لێكۆڵینەوەكان لەگەڵیاندا رەوانەی لایەنی دادوەریی كراون.