ھەولێر.. نوێژی ھەینی ئەنجام نادرێت

هه‌ولێر - AA

دوای ئەوەی دوێنێ پێنجشەممە، ژووری ئۆپەراسیۆنی پارێزگای ھەولێر چەند بڕیارێکی بە مەبەستی خۆپارێزی لە ڤایرۆسی کۆرۆنا دەکرد و، ئەمڕۆش بڕیارەکە کەوتووەتە واری جێبەجێکردنەوە.

لە خاڵی کۆتایی بڕیارەکەی ژووری ئۆپەراسیۆنی پارێزگای ھەولێر ئاماژە بەوەکراوە کە، دوای راوێژ لەگەڵ یەکێتی زانایانی ئایینی کوردستان و وەرگرتنی رەزامەندی وەزیری ئەوقاف و کاروباری ئایینی تا ١ی تەمووزی ٢٠٢٠ نوێژی ھەینی و بە کۆمەڵ لە سەرجەم مزگەوتەکانی سنووری پارێزگای ھەولێر ئەنجام نادرێن و مزگەوتەکان دادەخرێن.

لە ژێر رۆشنایی ئەم بڕیارەوە، ئەمڕۆ سەرجەم مزگەوتەکانی سنووری پارێزگای ھەولێر، دەرگاکانیان بەڕووی نوێژخوێناندا داخستووه‌ و بەمھۆیەوەش رێوڕەسمی نوێژی ھەینی بەڕێوەنەچوو.

ئەمە لە کاتێکدایە کە رۆژانە ژمارەی تووشبووان بە ڤایرۆسی کۆرۆنای نوێ لە ھەڵکشاندایە و بەپێی ئامارەکانی وەزارەتی تەندروستی حکوومەتی ھەرێمی کوردستان، تا ئێستا سێ ھەزار و ٤٥ کەس لە ھەرێمی کوردستان تووشی ڤایرۆسی کۆرۆنا بوون و، ١٢ حاڵەتی گیانلەدەستدان لە ھەولێر و ٧٠ حاڵەتیش لە سلێمانی تۆمارکراون.