لەیلا فروھەر: "لە داھاتوودا گۆرانی تر بە زمانی کوردی دەڵێم"

سلێمانی ـ AA

ژنە ھونەرمەندی گۆرانیبێژی دیاری ئێرانی، لەیلا فروھەر رۆژی رابردوو لەگەڵ تیمی میوزیکی یاوەری بە سەردانێک بۆ ئەنجامدانی کۆنسێرتێکی گۆرانی و میوزیک گەیشتە شاری سلێمانی، بڕیاریشە ئێوارەی سبەی چوارشەممە لە شاری سلێمانی ئەو کۆنسێرتە ئەنجام بدات.

ئێوارەی ئەمڕۆ لە کۆنگرەیەکی رۆژنامەوانیدا لەبارەی سەردانەکەی و ئەنجامدانی ئەو کۆنسێرتە، لەیلا فروھەر رایگەیاند، پێشتر کۆنسێرتێکی گۆرانی و میوزیکی لە تورکیا ھەبووە و لەو کۆنسێرتەدا پێشنیاری سەردانی شاری سلێمانی و ئەنجامدانی کۆنسێرتێکی بۆ کراوە و قبوڵی کردووە، ئەو گوتی: "بۆیەکەمجارە سەردانی سلێمانی دەکەم، پێشتر ھاتمە ھەولێر و ھاووڵاتیان بەشێوەیەکی گەرم پێشوازییان کردم، زۆر خۆشحاڵم ئەمجارە ھاتمە شاری سلێمانی و خەڵک پێشوازییەکی زۆر گەورەیان لێکردوم".

فروھەر گوتی: "لە ئەلبومەکانی پێشترم و پێش چوار ساڵ چوار گۆرانیم بە زمانی کوردی گووتووە لە گۆرانی کابوکی و بەرزی بەرزی و رێگای کرماشان و گیان گیان، لە بەرنامەمدا ھەیە لە داھاتوودا گۆرانی تر بە زمانی کوردی بڵێم".

لەیلا فروھەر کە لە دوای شۆڕشی ئێران لە ساڵی ١٩٧٩ وڵاتەکەی بەجێھێشتووە و لە ئەمریکا نیشتەجێیە، گەڕانەوەی بۆ وڵاتەکەیی بە خەون و ئارەزویەکی گەورەی ژیانی ناو دەبات.

ئەو گوتی: "ئەوە خەون و ئارەزوویەکی گەورەی ژیانی منە و بیری لێدەکەمەوە کە رۆژێک بگەڕێمەوە بۆ ئێران، بەڵام ئەو کاتە بگەڕێمەوە کە ئازادی لە ئێران ھەبێت و ئافرەتان ئازاد بن و بە ئازادی بخوێنن و بە زۆر جلوبەرگیان بەسەردا نەسەپێنرێت".

فروھەر سەبارەت بە کۆنسێرتەکەی سبەی لە شاری سلێمانی گوتی: "بۆ کۆنسێرتەکەی سبەی تیمی میوزیکی خۆم کە پێنج کەسن لەگەڵم ھاتوون لە ئەمریکاوە و تێیدا میوزیکی فارسی و کوردیمان دەبێت و سبەی رۆژێکی تایبەت و خۆشمان پێکەوە دەبێت".