كەمئەندامان كورسی و پێداویستییەكانیان سووتاند

سلێمانی ـ AA

پێش نیوەڕۆی ئەمڕۆ سەرۆک و ژمارەیەک لە ئەندامانی رێكخراوی یەكێتیی كەمئەندامانی كوردستان گردبوونەوەیەكی ناڕەزاییان لە بەردەم نووسینگەی سلێمانی پەرلەمانی كوردستان ئەنجامدا، ئەوان بەشێك لە كورسی و عەرەبانە و پێداویستییەكانی دیکەی تایبەت بە خۆیان هێنابووە بەردەم نووسینگەی پەرلەمان و وەك نیشاندانی ناڕەزایەتی و نیگەرانی خۆیان، ئەو پێداویستییانەی كەمئەندامانیان سووتاند.

ئەم ناڕەزایەتی و گردبوونەوەیەی كەمئەندامان لە چوارچێوەی ناڕەزایەتییە بەردەوامەكانی ئەوان دێت دژی خراپی دۆخی ژیانیان و دواكەوتنی مووچەكانیان كە بەهۆی قەیرانی داراییەوە ماوەی چوار ساڵە لەكاتی خۆیدا دابەش ناكرێت.

سەرۆكی رێكخراوەكە و سەرپەرشتیاری گردبوونەوەكە، سامان حوسێن لە لێدوانێكیدا بۆ دەزگاكانی راگەیاندن لە بارەی گردبوونەوە و سووتاندنی پێداویستییەكانیانەوە دوا و ئاماژەی كردبەوەی لە لایەن لایەنە دەسەلاتدار و پەیوەندیدارەكانەوە كار دەكرێت بۆ برسیكردنی كەمئەندامان، ئەو گوتی: "ئەگەر گوێمان لێنەگرن دڵنیاتان دەكەینەوە رۆژێك دێت كە كورسییەكانی خۆشتان دەسوتێت".