دەربەندیخان.. ژمارەیەک باڵندە ئازاد کران

دەربەندیخان-AA
لێپرسراوى هۆبەى راگەیاندنى فەرمانگەى ژینگەى سلێمانى، مەریوان قادر بۆ ئاژانسى ئانادۆڵو گوتى: "لە چوارچێوەى چالاکییەکانى فەرمانگەى ژینگەى سلێمانى و گرنگى دان بە ژینگەى کوردستان و جوانکردنى ژینگە، کۆمەڵێک باڵندەى کێویمان لە سنوورى پارێزگاى سلێمانى گەڕاندەوە ژینگەى خۆیان".

گوتیشى: "لەماوەى ئەمساڵدا نزیکەى 6 جارە چەندین باڵندەى کێویمان ئازاد کردووە، و بەردەوامیش دەبین بۆ ئەوەى ئەو باڵندە کێویانەى کە دەست بەسەر کراون لە ژینگەى کوردستان دوور خراونەتەوە ئێمە ئازادیان دەکەین بۆئەوەى کوردستان جوانتر بکەن".

بەڕێوەبەرى بەشى پۆلیسى دارستان و ژینگەى دەربەندیخان، ئەحمەد مستەفا رەسوڵ بە ئاژانسى ئانادۆڵوى راگەیاند: "بەهۆى ئەوەى قەزاى دەربەندیخان هەڵکەوتەى جوگرافیایەکى جوان و دڵڕفێنى هەیە، ئێمەش وەک خۆمان کارمان کردووە بۆ پاراستنى سەرجەم باڵندە کێوییەکان، تاوەکو دیمەنێکى جوان بدەن بە سرووشتى ناوچەکە".

گوتیشى: "ئێمە وەک ئەرکێکى نیشتمانى هەر کەسێک زیان بگەیەنێت بە باڵندە کێوییەکان ئەوا ئێمە وەک لایەنى پەیوەندیدار دەستگریان دەکەین و روبەڕووى یاسایان دەکەینەوە، تاوەکو ئێستاش بە دەیان کەسمان دەستگیر کردووە روبەڕووى یاسامان کردوونەتەوە".

ئەو راشیگەیاند: "سرووشتى باڵندەکان وایە کە هەر باڵندەیەک لە ناوچەیەک دەژیت وئەم شاخ و دۆڵەى ئێمەش کەوى تێدا دەژیت ئێمەش لەئەو باڵندەو پەلەوەرانە لە ئەو کەسانە دەیانپارێزین کە ڕاویان دەکەن".

قەزاى دەربەندیخان سەر بەپارێزگاى سلێمانیە بەهۆى بوونى دەریاچەکەیەوە و هەروەها ناوچە شاخاوییەکەیەوە ژمارەیەکى زۆر لە ئاژەڵ و گیاندار و باڵندەى کێوى تێدا دەژیت.

هەر لە چوار چێوەى ئازادکردنى باڵندەکان، لە قەزاى قەرەداغ و قەزاى پێنجوێن هەڵمەتى ئازادکردنى باڵندەکان بەڕێوەچوو لەو دوو قەزایە چەندین باڵندەى کێوى ئازاد کران.