سلێمانی.. چالاكییەكانی رۆژی جیهانی هۆشیاری ئۆتیزم

سلێمانی - AA
رۆژی 2ی نیسانی هەموو ساڵێك بە رۆژی جیهانی هۆشیاری ئۆتیزم دیاری كراوە و لەم رۆژەدا لە جیهاندا بە ئەنجامدانی چالاكی جۆراوجۆر باس لە نەخۆشییەكانی ئۆتیزم و كێشە و گرفتەكانی منداڵانی ئۆتیزم و خانەوادەكانیان و چۆنێتی كاركردن بۆ كەمكردنەوەی كێشەكانیان دەكرێت.
لە شاری سلێمانی لەم رۆژەدا چەند چالاكییەك لە ئەنجامدانی رۆیشتن لە پێناو منداڵانی ئۆتیزم، كردنەوەی پێشانگای كاری دەستی منداڵانی ئۆتیزم ئەنجام درا، هەروەها بە ئامادەبوونی بەرپرسانی حكوومی شارەكە رێوڕەسمی رۆژی جیهانی هۆشیاری ئۆتیزم لە ژێر دروشمی با منداڵانی ئۆتیزم بە هەموو جیاوازییەكانیانەوە قبووڵ بكەین، بەڕێوەچوو.
بەڕێوەبەری سەنتەری ئۆتیزم لە سلێمانی، رەحمان عەلی لەو بارەیەوە بە ئاژانسی ئانادۆڵۆی راگەیاند "جیهانی هۆشیاری ئۆتیزم لە ساڵی 2007ەوە لەلایەن نەتەوە یەكگرتووەكانەوە دیاری كراوە و لە ساڵی 2008 ەوە كاری پێدەكرێت، ئەم رۆژەش بریتییە لە هۆشیاركردنەوەی كۆمەڵگە بەهۆی زیادبونی نەخۆشییەكەوە ".
ئەو گوتی: "چالاكییەكانی ئەم یادە لە هەندێك وڵاتدا یەك مانگ دەخایەنێت و چالاكی جۆراو جۆر دەكرێت، چونكە رێژەیەكی زۆر منداڵی ئۆتیزم هەیە كە بەپێی ئامارەكان لە ناوچەی رۆژهەڵاتی ناوەڕاست سێ‌ ملیۆن منداڵی ئۆتیزم و لە ئەمریكا یەك ملیۆن منداڵ هەیە، هەموو ئەوانەش ئاماژەن بە زۆربوونی نەخۆشییەكە".
بەگوتەی ئەو بەرپرسەی سەنتەری نەخۆشی منداڵانی ئۆتیزم لە سلێمانی زیاتر لە 700 منداڵی ئۆتیزم هەیە و پێویستە هەر منداڵێك هەفتانە نزیكەی 45 سەعات كاری لەگەڵ بكرێت، گرفتی گەورەشیان ئەوەیە زۆربەی منداڵەكان لە ماڵەوەن و بەهۆی نەبوونی جێگای پێویستەوە ناتوانن ئەو ژمارە زۆرەی منداڵەكان لەخۆ بگرن.
ئۆتیزم نەخۆشییەكی بڵاو و ئاڵۆزی مێشكە و لە سێ ساڵی یەكەمی تەمەنی منداڵدا بەهۆی كێشەیەكی كۆئەندامی دەمار دەردەكەوێت، نیشانەكانی لە كەسێكەوە بۆ كەسێكی دیكە جیاوازن، بەو هۆیەوە فەرمانی ئاسایی مێشك تێكدەچێت و توانای گفتوگۆ و پەیوەندییە كۆمەڵایەتییەكانی منداڵەكە كەم دەبێتەوە.
كەسوكاری ئەو منداڵانەی نەخۆشی ئۆتیزمیان هەیە گرفتی گەورەیان هەیە و زۆربەیان بەو هۆیەوە لە كۆمەڵ دادەبڕێن و زۆربەی كاتەكانی ژیانیان تەرخان دەكەن بۆ منداڵەكانیان.
نیار حەمەسادق منداڵێكی ئۆتیزمی تەمەن شەش ساڵانی هەیە و لەگەڵ هاوسەرەكەی پێكەوە سەرقاڵی بەخێوكردنی منداڵەكەیانن، ئەو بۆ ئانادۆڵو گوتی: "ژیان لەگەڵ منداڵی ئۆتیزم زۆر زۆر قورسە و ناتوانین بچینە كۆمەڵگە و ناتوانین سەردانی كەس بكەین و كەسیش سەردانمان بكات، ئەو منداڵە هێندە ئەركی زۆرە لەسەرمان دراوسێكانیشمان هەستمان پێدەكەن".
ئەو ئاماژەی كرد بەوەی، منداڵەكەیان لە دوای تەمەنی دوو ساڵییەوە هەستیان كردووە بەوەی نەخۆشییەكەی لەگەڵدایە، لە ئێستاشدا تەمەنی گەیشتووەتە شەش ساڵ و ژیانێكی زەحمەتیان هەیە لەگەڵی، بەجۆرێك شەوانە خەوی نییە و تا بەیانی هاوار دەكات، هەروەها پەلاماردان و شكاندنی كەلوپەل و چەند كردەوەیەكی تری هەیە بەهۆی نەخۆشییەكەوە.