Almir Terzic
21 Ноември 2021•Ажурирај: 23 Ноември 2021
САРАЕВО
Најголем процент на вакцинирано население против коронавирусот во регионот на Западниот Балкан има Словенија, 54,2 %, а најмал Босна и Херцеговина (БиХ), 22 %, покажува анализата на Агенција Анадолија (АА).
Според податоците што ги објави Министерството за здравство на Северна Македонија, досега се аплицирани 1.666.261 доза вакцини, а со втора доза се вакцинирани 48 % од полнолетното население во земјата, односно 39 % од вкупното население. Заклучно со 17 ноември, во Северна Македонија вакцинирани се вкупно 818.689 граѓани, втора доза примиле 787.837, додека трета доза им е аплицирана на 59.735 граѓани.
Во Хрватска, според податоците на веб-страницата „Our World In Data“, досега против Ковид-19 се целосно вакцинирани 46,5 проценти од населението, во Србија 44,6 проценти, а во Црна Гора 40,3 проценти.
Во Албанија се вакцинирани 33 % од населението, а не се објавени податоци за Косово.
Најмногу дози вакцини се дадени во Србија, 7,66 милиони, каде целосно се вакцинирани 3,08 милиони лица. Во Хрватска се аплицирани 3,94 милиони дози вакцини, а целосно се вакцинирани 1,88 милиони лица, додека во Словенија се дадени 2,36 милиони дози, а целосно се вакцинирани 1,14 милиони лица.
Интересно е дека во Албанија се аплицирани повеќе од два милиони дози, поточно 2,03 милиони вакцини, а целосно се вакцинирани 937.000 лица.
Во Босна и Херцеговина се дадени 1,55 милиони дози вакцини, а целосно се вакцинирани 721.000 лица, додека во Црна Гора се дадени 519.000 дози вакцини, а целосно се вакцинирани 250.000 лица.
Загрижувачки е дека во изминатите четиринаесет дена на просторот на Западен Балкан починале повеќе од 2.700 лица како последица на заразеност со Ковид-19, што е значаен скок во однос на претходниот период.
Инаку, во последните две недели на Западен Балкан се регистрирани и 25 % повеќе новозаразени со коронавирус во однос на минатиот месец.
Имено, во последните две недели регистрирани се повеќе од 210.000 новозаразени со коронавирус.
