Dejan Maksimovic
23 Декември 2024•Ажурирај: 24 Декември 2024
БЕЛГРАД (АА) – Министерот за надворешни работи на Србија, Марко Ѓуриќ, денеска во Белград изјави дека членството во Европската Унија останува апсолутен стратешки приоритет на Србија, јавува Анадолу.
Ѓуриќ говореше на отворањето на Амбасадорската конференција на која се собраа амбасадори, генерални конзули и шефови на мисии во меѓународните организации на Србија, а чиј гостин беше министерот за надворешни работи на Азербејџан, Џејхун Бајрамов.
„Се собравме овде за заеднички да ја разгледаме надворешната политика на Србија во време кое е потурбулентно и попредизвикувачко од времето со коешто се соочила која било генерација дипломати во современата српска историја“, рече Ѓуриќ.
Шефот на српската дипломатија најави дека во наредниот период во своите редови ќе прими голем број млади, талентирани, висококвалификувани кадри и веќе во наредните недели ќе ја започне кампањата „Биди српски дипломат“.
Тој најави и дека во рамките на борбата за заштита на државната позиција кога е Косово во прашање, ќе формира Центар за заштита на територијалниот интегритет во рамките на Министерството за надворешни работи.
„Членството на Србија во Европската Унија останува апсолутен стратешки приоритет на нашата дипломатска мрежа“, порача Ѓуриќ.
Министерот за надворешни работи на Азербејџан, Џејхун Бајрамов, ги истакна исклучителните односи меѓу Србија и Азербејџан, како и меѓу двајцата претседатели Илхам Алиев и Александар Вучиќ. Тој ги оцени како искрени во сите области на соработка меѓу двете земји.
„Азербејџан придонесе за снабдување со енергетски извори, а нашата нафта продолжува да тече на европскиот пазар и оваа динамика се развива многу успешно. Денес, Азербејџан снабдува 12 земји со гас. Со гордост можам да кажам дека оваа година гасот од Азербејџан стигна и до Србија. Имајќи ја предвид вашата стратешка положба, веруваме дека вашата земја може да биде и транзитна рута“, рече Бајрамов.
Собирот го поздрави и претседателката на Собранието на Србија, Ана Брнабиќ, која исто така нагласи дека членството во ЕУ е приоритет на српската надворешна политика.
Министерството за надворешни работи на Република Србија ја организираше Амбасадорската конференција, која, денес и утре, по 12 години, во Белград ги собира амбасадорите, генералните конзули и шефовите на претставништвата во меѓународните организации на Србија.
