Emirhan Yılmaz
22 Јануари 2025•Ажурирај: 23 Јануари 2025
ИСТАНБУЛ (АА) - Тесла доминира меѓу светските производители на автомобили со пазарна капитализација од 1,37 билиони долари, а кинеските компании интензивно ја зголемуваат конкуренцијата, јавува Анадолу.
Компанијата за електрични возила (EВ) на милијардерот Илон Маск е на врвот на листата од 50 највредни производители на автомобили во светот, според податоци собрани од Анадолу, врз основа на веб-страницата companiesmarketcap.com.
По Тесла е јапонскиот производител Тојота со пазарна капитализација од 240 милијарди долари, а кинеските компании Шаоми и БЈД се на трето и четврто место со 111,9 милијарди и 110,1 милијарди долари.
Иако најголем дел од приходите на Шаоми доаѓаат од различни технолошки производи, во 2021 година компанијата најави производство на електрични возила и лани го лансираше својот електричен спортски автомобил СУ7.
Европските производители Ферари, Порше и Мерцедес-Бенз следуваат по кинеските брендови со пазарна капитализација од 78,2 милијарди, 58,4 милијарди и 57,7 милијарди долари, соодветно.
Џенерал Моторс е на осмо место со 56 милијарди долари, а по него се БМВ со 52,4 милијарди и Фолксваген со 50,7 милијарди долари.
Меѓу првите 50 се најдоа и два турските производители. Компанијата Форд Отосан е на 38. место со пазарна капитализација од 9,1 милијарди долари и Тофаш на 47. место со 3 милијарди долари.
- Кинеските брендови во подем
Автомобилската индустрија во светот се наоѓа пред огромна трансформација со подемот на електричните возила. Традиционалните брендови сè уште произведуваат возила на бензин, но новата генерација производители станува сè позначајна со големите инвестиции во технологијата на електрични возила.
Пренасочувањето кон електрични возила ја менува глобалната конкурентска динамика, со тоа што традиционалните гиганти вложуваат напори да го одржат својот пазар со иновативни модели на електрични и автономни возила, а кинеските брендови ја зајакнуваат својата позиција.
Меѓу првите 50 производители на автомобили, 17 се кинески. На листата се осум јапонски, шест американски, четири германски и три индиски компании. Јужна Кореја, Шведска, Туркије и Тајван имаат по две компании што произведуваат автомобили, а Франција, Италија, Холандија и Виетнам по една компанија.
