Beyza Binnur Dönmez
18 Декември 2025•Ажурирај: 19 Декември 2025
Вкупно 170 белгиски уметници и културни работници ја осудија одлуката на јавниот радиодифузер РТБФ да учествува на Евровизија 2026 и покрај тоа што Израел, исто така, ќе биде дел од натпреварот, наведувајќи дека таквата одлука ги нарушува етичките обврски на јавните медиуми, објавија локалните медиуми, јавува Анадолу.
Во заедничко писмо потписниците наведуваат дека „со згрозеност на 4 декември ја дознале веста за учеството на Израел на Евровизија 2026“, пренесе белгискиот дневен весник „Ла Либре“ денес.
Меѓу потписниците се наоѓаат и познати културни имиња, како актерката и режисерка Јоланд Моро, режисерот Тиери Мишел, хумористката Флоранс Мендез и актерот Давид Мурџија.
Според извештајот, уметниците прават споредба со одлуката на Европската радиодифузна унија (ЕБУ) во врска со војната во Украина, потсетувајќи дека Русија била исклучена од Евровизија „за помалку од 48 часа по инвазијата во февруари 2022 година“, додека во случајот со Газа, како што наведуваат, ЕБУ „одбива да го исклучи Израел и покрај продолжувањето на, како што ја нарекуваат, војната на истребување против палестинскиот народ“.
Тие ги критикуваа РТБФ и белгискиот јавен радиодифузер ВРТ, кои се надлежни за изборот на белгискиот претставник, оценувајќи дека со одлуката да го задржат учеството на Белгија „прават сериозно прекршување на етичките и моралните обврски на јавните канали“.
Во писмото се наведува и дека Израел, според нив, со години ги користи големите уметнички и културни настани за политички цели. „Израелската Влада ги користи овие настани за пропаганда, со цел да се заборави режимот на окупација, колонизација и апартхејд врз палестинскиот народ“, се наведува во писмото.
Според потписниците, учеството во Евровизија „му овозможува на Израел да ја одржува илузијата дека е модерна и примерна западна демократија, со што полесно се прикриваат неговите, како што велат, криминални дејства“.
Писмото завршува со повик до РТБФ „да ја почитува својата јавна мисија и да го откаже учеството на Евровизија 2026 сè додека држава што ги гази темелите на нашата заедничка човечност е добредојдена на натпреварот“.
