Saadet Firdevs Aparı
29 Април 2022•Ажурирај: 02 Мај 2022
АНКАРА (АА) - Научниците утврдија дека глобалното затоплување ќе предизвика ширење на 4.000 вируси меѓу луѓето и животните до 2070 година, пренесува Агенција Анадолија (АА).
Според веста на „Си-ен-би-си“, новата студија открива дека глобалното затоплување ќе предизвика ширење на нови вируси меѓу животните и дека постои ризик новите заразни болести да се пренесат од животни на луѓе.
Истражувањето, објавено во списанието „Нејчр“, испитуваше како климатските промени може да имаат влијание врз преносот на болести меѓу цицачите.
Научниците нагласуваат дека глобалното затоплување ќе принуди повеќе од 3.000 видови цицачи да мигрираат, а средбата меѓу овие видови ќе предизвика ширење на 4.000 вируси до 2070 година.
Во студијата, исто така, се наведува дека повеќето од средбите меѓу видовите ќе бидат во Југоисточна Азија.
За да се предвиди каде ќе се случат средбите на видовите животни, беше искористено компјутерското моделирање.
Грег Елбери, еден од авторите на студијата, рече дека секој од овие вируси веројатно ќе влијае на здравјето на животните и дека ќе се шири меѓу луѓето.
Меѓу другото, Елбери подвлече дека ширењето на 4.000 вируси не значи нови епидемии како што беше епидемијата на Ковид-19.
