İlayda Çakırtekin
19 Март 2026•Ажурирај: 19 Март 2026
Данската премиерка Мете Фредериксен денес изјави дека понудата на американскиот претседател Доналд Трамп за преземање на Гренланд останува непроменета, јавува Анадолу.
„За жал, сè уште верувам дека желбата на американскиот претседател да го преземе Гренланд не е стивната и затоа оваа ситуација е сериозна, а таква беше цело време“, изјави Фредериксен за новинарите додека лидерите на ЕУ се собираа во Брисел, пренесува радиодифузерот ДР.
Таа потврди дека преговорите со Американците се во тек. „Се надевам на добар исход”, изјави таа.
„Се наоѓавме во најтешката надворешнополитичка ситуација од Втората светска војна наваму, а единствена причина зошто денес сме во подобра позиција е тоа што имаме блиски, силни и добри европски сојузници, како и тоа што инвестиравме време, труд и наши лични ресурси во таа соработка“, истакна Фредериксен.
Таа предупреди дека во денешно време човек „никогаш не смее да му сврти грб“ на светот.
Изјавите на Фредериксен следуваат откако радиодифузерот ДР објави дека војниците се подготвуваат за можен американски напад врз Гренланд во контекст на заканите на Трамп за преземање на островот.
Кога данските војници биле преместени на Гренланд во јануари, тие наводно носеле експлозиви за уништување на клучните писти и резерви на крв за лекување на ранетите, во обид да се подготват за блокирање на евентуалното американско преземање на островот.
Во последните месеци Трамп го обнови својот интерес за американска контрола врз Гренланд, наведувајќи ја загриженоста за националната безбедност во однос на Русија и Кина. Тој се закани со санкции за европските земји што се спротивставуваат на таквиот чекор.
Потоа Трамп ги повлече заканите по средбата со генералниот секретар на НАТО, Марк Руте, на Светскиот економски форум во Давос, Швајцарија, изјавувајќи дека воспоставиле рамка за потенцијален договор што го вклучува Гренланд и поширокиот арктички регион, по што следуваа разговори меѓу САД, Данска и Гренланд.
