Грција ризикува да ги изгуби ЕУ-фондовите поради нелегалното враќање на мигрантите

Грција ризикува да ги изгуби фондовите на Европската Унија (ЕУ) поради нелегалното туркање назад на мигрантите, објави денес „Политико“, пренесува Анадолу.

Ризикот доаѓа како резултат на истрагата на пограничната агенција на ЕУ, Фронтекс, за 12 отворени случаи на потенцијално кршење на човековите права на мигрантите на грчките граници - најголем број тековни истраги од агенцијата во кои е вклучена земја членка на ЕУ, објави медиумот со седиште во САД.

Се истакнува дека најголемиот дел од случаите се поврзани со туркањето назад на мигрантите од страна на грчките службеници за миграција на копнените граници и на море, што е нелегално според Конвенцијата на Обединетите нации за бегалци и меѓународното право.

„Политико“ вели дека Фронтекс најавил дека ќе даде конкретни предлози за Грција да ги имплементира, со потенцијални последици доколку се тие се игнорираат.

„Извршниот директор на Фронтекс изјави дека очекува спроведување на сите овие препораки. Во спротивно, ќе земе предвид намалување или прекин на кофинансирањето (на пловилата на Грчката крајбрежна стража финансирани од Фронтекс)“, рече портпаролот на агенцијата Крис Боровски.