Министерот за одбрана на новата сириска администрација: „Нашите односи со Туркије ќе бидат одлични“

ДАМАСК (АА) - Мурхаф Ебу Касра, министер за одбрана на новата сириска администрација, денес изјави дека односите на администрацијата со Туркије ќе бидат „одлични“, јавува Анадолу.

Истакнувајќи дека ќе одржат разговори со источните и западните земји за опремување на националната армија, Ебу Касра за новинарите во главниот град Дамаск изјави дека продолжуваат разговорите со турските власти за присуството на Турските вооружени сили во Сирија.

Во врска со терористичката организација ПКК/ЈПГ, тој рече дека терористичката организација „мора да се самораспушти пред Конференцијата за национален дијалог“.

На прашањето за ставот на терористичката организација ПКК/ЈПГ во однос на тоа вооружените групи да се распуштат и да се соберат под капата на Министерството за одбрана, Ебу Касра изјави: „Преговорите се во тек. Подготвени сме за секое сценарио.“

Потсетувајќи на тврдењето на терористите на ПКК/ЈПГ дека „има 10.000 борци на ДЕАШ во нивните затвори, Ебу Касра рече дека тие проценуваат дека точниот број е 2.500“.

Во својата 40-годишна терористичка кампања против Туркије, ПКК, која е наведена како терористичка организација од страна на Туркије, САД и Европската Унија, е одговорна за смртта на над 40.000 луѓе, меѓу кои и деца и жени. ЈПГ е сириски огранок на ПКК.

Терористичката организација ПКК/ЈПГ се обиде да ја искористи неизвесноста по падот на режимот на Башар ал Асад за забрзување на напорите за воспоставување „терористички коридор“ по должината на границата со Туркије.

Во однос на континуираната окупација на сириската територија од страна на израелската армија по падот на режимот на партијата Баас, која ја надминува Голанската Висорамнина и тампон зоната, Ебу Касра рече дека тие се „во контакт со посредниците за да се запре израелското напредување на југ“.

„Ние ги притискаме да се повлечат“, додаде тој.


- Враќање на офицерите што ја напуштија армијата за време на соборениот режим -

Ебу Касра рече дека се одржани состаноци со над 70 различни групи, меѓу кои и со Сириската национална армија (СНА), воените фракции во Јужна Сирија и Слободната сириска армија (ФСА) стационирана во Ал Танф.

„Сите беа позитивни за нашата визија за обединување под капата на Министерството за одбрана“, рече Ебу Касра, нагласувајќи дека тие не сметаат дека е соодветно воените групи да дејствуваат во посебни блокови.

Тој нагласи дека во Министерството е формирана комисија од 10 високи команданти што ќе ја разгледаат ситуацијата во армијата, додавајќи дека трансферот на командантите што во минатото ја напуштиле сириската армија ќе биде завршен во рок од два месеца.

„Бројот на команданти што ја напуштија армијата во Северозападна Сирија, команданти што ја напуштија армијата на почетокот на 2011 година и работеа со опозициските групи и офицерите во странство се движи од 6.400 до 7.000“, рече Ебу Касра.

Тој, исто така, ја изрази нивната желба од Туркије да купат машини и опрема за отстранување мини за расчистување на мините што ги оставија соборените сили на Асадовиот режим во Сирија.

- Борба против терористичката организација ДЕАШ -

Ебу Касра рече дека Министерството за надворешни работи на новата сириска администрација работи на обликување на односите со Русија и додаде: „Иран треба да ги тргне рацете од Сирија. Сириските шиитски компоненти се сириски компоненти.“


„За да се поправи јазот меѓу општеството и армијата, должност на армијата ќе биде да ги заштити татковината и народот.“

„Министерството за одбрана не е институција што ѝ припаѓа на едната страна, тоа им припаѓа на Сиријците“, истакна тој.

Ебу Касра додаде дека новата администрација има голем капацитет за да се справи со терористичката организација ДЕАШ.