Furkan Abdula
24 Октомври 2022•Ажурирај: 25 Октомври 2022
СКОПЈЕ (АА) - Министерот за надворешни работи на Северна Македонија, Бујар Османи, ја отвори овогодинешната Медитеранска конференција на ОБСЕ во Јордан, во својство на претседавач на групата медитерански партнери за соработка на ОБСЕ, пренесува Агенција Анадолија (АА).
Според соопштението на МНР на Северна Македонија, во воведното обраќање Османи се осврнал на споделените безбедносни предизвици со кои се соочуваат земјите од Медитеранот и земјите учеснички на ОБСЕ.
Тој се осврна на агресијата од страна на Руската Федерација врз Украина и силното влијание врз политичките и безбедносните процеси врз регионот на ОБСЕ и земјите од Медитеранот.
„И покрај тоа што нашите заеднички напори да ја запреме агресијата врз Украина во моментот не вродуваат со плод, во светло на воинственото лице на Руската Федерација, ова не е време за дефетизам, туку активен ангажман. Ние мора да најдеме начин да ги намалиме болката и тежината на агресијата, со силен фокус врз луѓето кои страдаат и имаат потреба од поддршка. Треба да го искористиме овој форум за да повторно ја подвлечеме безбедносната меѓузависност меѓу двата региона, тој на ОБСЕ и Медитеранот, конструктивно и во духот на вистинско партнерство – споделени приоритети кои задираат во животите на сите наши граѓани”, истакна Османи.
Во продолжение тој упати на важноста од спроведувањето на националните агенди во функција на поддршка и зајакнување на младите, жените, справувањето со ефектите на климатските промени и борбата против трговијата со луѓе. Османи подвлече дека овие теми ќе бидат дел од приоритетната агенда на нашето претседавање со ОБСЕ во 2023 година.
„Нашата младина веќе ги чувствува сините ефекти од климатската криза. Тие треба да бидат на браникот во справувањето со овие феномени во годините што доаѓаат. Нашата иднина ќе биде во нивни раце и ние мора да создадеме предуслови за нивна ефикасна акција и делотворен ангажман”, нагласи тој.
Во дискусијата на отворањето учествуваа министрите за надворешни работи на Јордан, Сафади; Полска, Рау; Шведска, Билсторм (преку видеообраќање) и генералната секретарка на ОБСЕ, Шмид.
„Фокусот на дебатата беше насочен кон безбедносните предизвици предизвикани со агресијата на Руската Федерација врз Украина и соодветните импликации; безбедносната меѓузависност меѓу регионите, европскиот и медитеранскиот, и потребата од конкретна соработка и позитивен ангажман; импликациите од агресијата, недостигот и недостапноста на храна, енергетската несигурност, климатската криза, итн.“, се додава во соопштението.
На дводневната конференција учествуваат преку 200 високи претставници на земјите учеснички на ОБСЕ и медитеранските партнери за соработка на приоритетните теми поврзани со зајакнувањето на младите и жените, справувањето со ризиците од климатските промени и трговијата со луѓе, и сл.
