Kanyshai Butun
29 Декември 2025•Ажурирај: 31 Декември 2025
ИСТАНБУЛ (АА) - Херојот Ахмед ал-Ахмед, кој разоружи вооружен човек за време на пукањето на плажата Бонди во Австралија, рече дека сакал да го спречи напаѓачот да им одзема живот на невини луѓе, пренесува Анадолу.
„Цел ми беше само да му го земам оружјето и да го спречам да убива невини луѓе“, рече Ахмед, кој е роден во Сирија, во интервју за Си-би-ес њуз.
Вечерта на 14 декември маж и неговиот син отворија оган на плажата во Сиднеј, убивајќи 15 лица и повредувајќи 42. Полицијата го карактеризира инцидентот како „терористички напад“.
Ахмед ги освои насловните страници и срцата низ целиот свет поради својата храброст нафрлајќи се на еден од двајцата напаѓачи на плажата Бонди во Сиднеј, најголем град во Австралија и главен град на Нов Јужен Велс.
Ахмед рече дека „не се грижел за ништо“ освен за животите што потенцијално би можел да ги спаси.
„Знам дека спасив многу, но жал ми е за загубените (животи)“, рече тој.
Ахмед раскажа дека за да го разоружи вооружениот човек му „скокнал“ на грб и го удрил, борејќи се да му го тргне оружјето.
„Го држев со десната рака и почнав да му зборувам, знаете, да го предупредам, фрли го пиштолот, престани да го правиш тоа што го правиш, сè дојде брзо“, рече тој.
„И емоционално, правам нешто, односно чувствувам нешто, моќ во телото, мојот мозок... Не сакам да гледам луѓе како се убиваат пред мене, не сакам да го слушам неговиот пиштол, не сакам да гледам луѓе како врескаат и молат, бараат помош, тоа е мојата душа што ме моли да го направам тоа“, се присети тој.
„Сè во моето срце, во мојот мозок, сè, работеше само за да успеам да ги спасам животите на луѓето“, рече Ахмед.
Еден од двајцата напаѓачи беше убиен, а другиот беше критично повреден.
Австралискиот премиер Ентони Албаниз го прогласи Ахмед, инаку роден во Сирија, за „најдобриот во нашата земја“.
Ахмед, кој се преселил во Австралија во 2006 година и е татко на две ќерки, е застрелан четири до петпати во левото рамо и се наоѓа на лекување во болницата „Сент Џорџ“ во Сиднеј.
