Riyaz Khaliq Khaliq
29 Декември 2025•Ажурирај: 30 Декември 2025
ИСТАНБУЛ (AA) – Кина денес им се придружи на сè поголем број земји низ светот што се спротивставуваат на одлуката на Израел да го признае Сомалиленд, отцепена територија на Сомалија, како независна држава, јавува Анадолу.
Кина е загрижена и цврсто се противи на ваквиот потег, изјави портпаролот на кинеското Министерство за надворешни работи, Лин Џијан, одговарајќи на прашање во врска со одлуката на Тел Авив од минатата недела.
Потсетувајќи на отфрлањето и осудата на овој потег од страна на голем број земји и мултинационални блокови, Лин истакна дека Кина „цврсто ги поддржува сувереноста, обединувањето и територијалниот интегритет на Сомалија“, нагласувајќи дека Сомалиленд е „неотуѓив дел“ од таа држава.
Пекинг се противи на каков било потег што ја дели територијата на Сомалија. Прашањето за Сомалиленд, според Пекинг, е целосно внатрешно прашање на Сомалија и треба да биде решено од сомалискиот народ, на начин што одговара на националните услови на земјата.
Лин додаде дека земјите „надвор од регионот треба да престанат со несоодветно мешање“ и дека ниедна држава не треба да „помага или поттикнува сепаратистички сили во други земји за свои себични интереси“.
Портпаролот на кинеското МНР, исто така, ги повика властите во Сомалиленд „јасно да согледаат каде води сегашниот курс“ и веднаш да го запрат секој сепаратистички пат и „судир со надворешни сили“.
Во петокот Израел стана прва земја во светот што го призна Сомалиленд како суверена држава, што предизвика бран реакции и осуди од голем број земји во Африка и на Блискиот Исток, меѓу кои и Турција, која беше дел од заедничката изјава објавена во саботата од Катар.
Сомалиленд, кој нема меѓународно признание откако прогласи независност од Сомалија во 1991 година, функционира како де факто независен административен, политички и безбедносен ентитет. Централната власт во Могадишу нема реална контрола врз регионот, додека раководството на Сомалиленд досега не успеа да обезбеди меѓународно признавање.
Сомалиската Влада одбива да го признае Сомалиленд како независна држава, го смета за составен дел од својата територија и секој директен договор или ангажман со регионот го оценува како кршење на суверенитетот и единството на земјата.
