Каја Калас: Доколку ситуацијата во Газа не се подобри, тогаш сите не сме направиле доволно

ИСТАНБУЛ (АА) - Шефицата за надворешна политика на Европската Унија (ЕУ), Каја Калас, денес предупреди дека доколку ситуацијата во Газа сè уште не се подобри, тоа значи дека сите не направиле доволно, јавува Анадолу.

„Ситуацијата е сè уште многу, многу лоша во Газа. Значи, сè додека навистина не се подобри, значи дека сите не сме направиле доволно“, рече Калас во својата изјава пред состанокот на Советот за надворешни работи во Брисел.

Укажувајќи на „катастрофалната“ ситуација на терен, таа истакна дека тоа што нема прекин на огнот го отежнува обезбедувањето хуманитарна помош.

„Постигнавме заедничко разбирање со Израел за навистина да ја подобриме ситуацијата на терен. Но не станува збор за документот, туку за неговото спроведување. Значи, гледаме некои позитивни знаци“, додаде таа.

Калас изрази надеж дека политичкиот договор за 18. пакет санкции против Русија ќе биде постигнат во вторник или во среда, нагласувајќи дека тој е „многу блиску“.

„Потоа ќе разговараме и за Иран. Секако, во наш интерес е да ги продолжиме преговорите по дипломатски пат“, додаде таа.