„Останаа денови Хамас да го прифати договорот за прекин на огнот“, изјави американскиот државен секретар Марко Рубио

АМАН (АА) - Американскиот државен секретар Марко Рубио изјави дека Израел продолжува со бомбардирањето на градот Газа и додаде дека истекува времето за Хамас да го прифати договорот за прекин на огнот, известува Анадолу.

Во разговор со новинарите по заминувањето од Израел за Катар, Рубио истакна:

„Израелците започнаа операции таму. Затоа, веруваме дека имаме многу краток временски рок за постигнување договор. Немаме повеќе месеци; веројатно имаме само денови, можеби и неколку недели.“

Изјавите на Рубио доаѓаат во време кога се убиваат цивили во интензивните израелски воздушни напади.

Нападите, кои Израел ги опишува како „воени операции“, ја продлабочуваат хуманитарната криза во Газа и предизвикуваат растечки критики од меѓународната заедница.

Во меѓувреме, според „Ерусалим пост“, израелската Армија започна нова копнена офанзива врз градот Газа.

Во веста базирана врз израелски извори, се наведува дека тенковите почнале да влегуваат во градот.