Австралија: Поради поплавите ќе биде прекината наставата во 120 училишта во Викторија

МЕЛБУРН (АА) - Поради поплавите утре ќе биде прекината наставата во 120 училишта во сојузната австралиска држава Викторија, пренесува Агенција Анадолија (АА).

Како што објави „Еј-би-си њуз“, обилните врнежи во југоисточниот дел на земјата довеле до нарушување на секојдневието во Викторија.

Премиерот Даниел Ендрјус рече дека околу 120 училишта и 100 градинки ќе бидат затворени утре поради дождовите и поплавите.

Официјалните претставници, кои неколку дена претходно издадоа предупредување за поплави, сега соопштија дека е предоцна за евакуација на жителите во окрузите Шепартон, Мурупна, Орвал и Елмор во сојузната држава.

На граѓаните кои живеат во овие подрачја им е препорачано да се засолнат на поголема надморска височина.

Упатен е повик за итни случаи во регионот Нарандера во Нов Јужен Велс, каде врнежите беа обилни, а до жителите од регионот беше упатено предупредување за евакуација.

Се очекува денес австралискиот премиер Ентони Албанис да ги посети подрачјата зафатени од поплавите.