Hakan Çopur
29 Февруари 2024•Ажурирај: 01 Март 2024
ВАШИНГТОН (АА)
- Хакан ЧОПУР
Медеја Бенјамин, американска еврејка, активистка и основачка на антивоената невладина организација „КодПинк“, изјави дека уништувањето што Израел го спроведува во Газа е „геноцид“ и додаде: „Ѝ се обраќам на администрацијата на Бајден, срам да ви е поради тоа што го направивте (во Газа). На рацете на оваа администрација и членовите на Конгресот има крв (на Газа)“, известува Анадолу.
Додека реакциите во САД за нападите на Израел врз Газа продолжуваат, Бенјамин, основачка на антивоената организација „КодПинк“, која беше дел од голем број протести на палестинските приврзаници во главниот град Вашингтон, зборуваше за своите чувства и размислувања со дописникот на АА.
Објаснувајќи дека од Виетнамската војна досега САД биле вклучени во голем број војни, во Ирак, во Авганистан и на други места, Бенјамин рече: „САД се моќна земја и досега никогаш не одговараа за тоа што го направија во Ирак, Авганистан и во затворот Абу Граиб. Тие не беа повикани на одговорност за ова. Како американска државјанка, сакам мојата Влада да одговара за овие постапки.“
- „Тоа што се случи во Газа е геноцид“
Опишувајќи ги хуманитарната криза во Газа и нападите на Израел како „страшни“, Бенјамин истакна: „Тоа што се случи во Газа е геноцид, етничко чистење, масакр, дури и холокауст. Тоа што се случи таму е страшно. Повеќе од 30.000 невини луѓе, главно жени и деца, беа убиени.“
Потсетувајќи дека американскиот Конгрес сѐ уште се обидува да прати нова помош за Израел, Бенјамин нагласи дека и американските медиуми не известуваат искрено за тоа што се случува во Газа.
„Јас сум еврејка и мислам дека имам право да зборувам за ова прашање. Оваа ситуација не му помага на еврејскиот народ, не му помага на Израел, не им помага на односите на САД со муслиманскиот свет и, генерално, не ѝ помага на светската стабилност“, рече Бенјамин.
- „Срам да ѝ е на администрацијата на Бајден“
Обраќајќи се до американската администрација, која продолжува со безусловна поддршка за Израел, Бенјамин рече дека е време да се каже „стоп“ за оружјето и помошта пратена до оваа земја.
„На администрацијата на Бајден ѝ го велам следново, срам да ви е за тоа што го направивте досега (во Газа). Секој ден ги бојам рацете на овој начин (крваво црвена) затоа што оваа администрација и членовите на Конгресот на рацете имаат крв (на Газа). Ние, се разбира, повикуваме на прекин на огнот и велиме: 'На Израел повеќе не праќајте му помош'. Веќе е направена огромна штета. Мислам дека светот не треба да им прости на САД за тоа што го направија (во Газа). Исто така, американскиот народ, кој е со отворен ум по ова прашање, не треба да ѝ прости на администрацијата на Бајден“, истакна Медеја Бенјамин.
Потсетувајќи дека луѓето во Газа умираат од глад и истакнувајќи дека ова е срцепарателна ситуација, американската активистка додаде:
„Конгресот не сака да им помогне на луѓето во Газа и дозволува да се случи ова гладување. Администрацијата на Бајден вели: ‘Ние се грижиме за луѓето во Газа и на Израел му велиме, ве молиме, не убивајте толку многу луѓе’, но тоа што тие го прават таму е токму спротивното. Сега се обидуваат да пратат уште 14 милијарди долари за Израел да купи бомби за да убие уште повеќе луѓе.“
- „Ставете го овој човек (Нетанјаху) в затвор и изведете го пред судот во Хаг“
Обраќајќи му се на израелскиот премиер Бенјамин Нетанјаху на крајот од разговорот, американската еврејка, активистка, го рече следново:
„Што може друго да ѝ кажете на Владата на Нетанјаху освен ‘поднесете оставка’. Овој човек (Нетанјаху) ставете го в затвор и изведете го во Хаг (пред Меѓународен суд на правдата). Сите тие се воени злосторници, но, искрено, и ние имаме свои воени злосторници во САД.“
Бенјамин ја повика меѓународната заедница итно да се обедини за отворање на границите и пристаништата за да може да се испорача хуманитарна помош за Рафа и другите делови на Газа.
