Американски претставник: Русија и Украина може да постигнат прекин на огнот за неколку недели

ИСТАНБУЛ (АА) - Американскиот специјален пратеник, Стив Виткоф, денес изјави дека целосен прекин на огнот меѓу Русија и Украина може да биде постигнат наредните неколку недели, јавува Анадолу.

„На добар пат сме да постигнеме договор меѓу Русија и Украина“, рече Виткоф во телевизиската програма, додавајќи дека по постигнувањето прекин на огнот ќе следува и олеснување на санкциите против Русија.

Тој, исто така, потврди дека во понеделник и вторник ќе се одржат нови средби за Украина во Саудиска Арабија.

Виткоф го опиша разговорот меѓу претседателите Доналд Трамп и Владимир Путин како „епски и ориентиран кон исходот“, нагласувајќи го напредокот кон договор за ставање крај на конфликтот.

Тој додаде дека „најверојатно ќе се случи“ нова средба меѓу двајцата лидери.

Вчера Путин и Трамп разговараа за нормализирање на билатералните односи, можностите за решавање на конфликтот во Украина, како и за ситуацијата на Блискиот Исток.

Трамп изјави дека разговорот, кој траел повеќе од два часа, бил „многу добар и продуктивен“.