Бајден рече дека САД разговараат за можни израелски напади врз иранските нафтени постројки

ВАШИНГТОН (АА) - Претседателот Џо Бајден вчера изјави дека САД разговараат со Израел за потенцијални напади врз ирански нафтени постројки откако Техеран лансираше речиси 200 балистички ракети кон Израел, јавува Анадолу.

„Прво, ние не му дозволуваме на Израел. Го советуваме Израел. И нема ништо да се случи денес. Подоцна ќе разговараме за тоа“, изјави Бајден за новинарите во Белата куќа на прашањето дали САД ќе му дозволат на Тел Авив да му возврати на Иран.

Запрашан за предлозите Израел да ги погоди иранските нафтени постројки, клучен извор на приходи за Техеран, Бајден рече: „Разговараме за тоа“, додавајќи: „Мислам дека тоа би било малку...“. Тој не продолжи со својата мисла и не е јасно дали сакаше да изрази трема поради предлогот.

Иран вети дека неговиот одговор ќе ескалира доколку Израел се одмазди за нападот во вторникот за кој рече дека е одговор на израелското убиство на генералниот секретар на Хезболах, Хасан Насрала, поранешниот политички лидер на Хамас, Исмаил Ханије, и командантот на Корпусот на Исламската револуционерна гарда, Абас Нилфорошан.

„Ние сме апсолутно против крвопролевање. Секогаш сме велеле: сакаме мир, сакаме смиреност. Не сакаме да се пролее крв во ниту една држава. Но Израелците нѐ туркаат кон ова“, рече иранскиот претседател Масуд Пезешкијан во средата.

Ракетниот напад во вторникот предизвика жртви, материјална штета и доведе до затворање на воздушниот простор на Израел, при што милиони Израелци брзаат кон засолништата.

Израел започна масовни воздушни напади на 23 септември врз, како што ги нарекува, позиции на Хезболах низ Либан, во кои се убиени повеќе од 1.000 лица, а над 2.950 беа повредени, објави либанското Министерство за здравство.

Хезболах и Израел разменуваат прекуграничен оган од почетокот на израелската војна во Газа, во која загинаа речиси 41.600 луѓе, главно жени и деца, од минатиот 7 октомври.

Меѓународната заедница предупреди дека израелските напади врз Либан би можеле конфликтот во Газа да го претворат во поширока регионална војна.