Бајден санкционира четворица еврејски доселеници поради напад врз Палестинци на Западниот Брег

ВАШИНГТОН (АА) - Американскиот претседател Џо Бајден вчера потпиша нова извршна наредба со која одобрува санкции против еврејски доселеници што нападнале Палестинци на окупираниот Западен Брег, како и ставање на четири лица на црната листа, пренесува Анадолу.

Овој чекор е преземен во момент кога насилството на доселениците врз Палестинците на Западниот Брег енормно ескалира во екот на војната во окупираниот Појас Газа.

Драматичниот пораст на насилството на доселениците на Западниот Брег поттикна некои од Бајденовите најгласни демократски сојузници да преземат акција за да се спречи тоа.

Со одлука им се забранува на поединци пристап до американскиот финансиски систем, им се замрзнува целиот имот што веќе е под американска јурисдикција и им се забранува влез во САД, изјавија двајца високо позиционирани претставници на Бајденовата администрација. Истовремено, на американските државјани генерално им е забрането да работат со нив.

Овие официјални лица потврдија дека четири лица се казнети поради различни активности, вклучително и насилство над Палестинците, застрашување, уништување имот, присилно раселување на палестинските цивили и закана кон бедуинските заедници.

Советникот за национална безбедност, Џејк Саливан, ги информираше претставниците на кабинетот за политичките опции за сторителите на насилство, а државниот секретар Ентони Блинкен во декември најави визни санкции кон лицата за кои е утврдено дека извршиле насилство.

Едно од официјалните лица потврди дека Бајденовата администрација ги известила израелските власти за овие потези. Тој ги негираше извештаите дека САД разгледува санкции кон израелскиот министер за финансии Безалел Смотрич или кон министерот за национална безбедност Бен Гвир - двајцата екстремно десничарски политичари на чело на движењето на доселениците.