БиХ: Зголемени безбедносни мерки по пукањето во Сански Мост

САРАЕВО (АА) - Силни полициски сили се наоѓаат во Сански Мост, каде што се зголемени безбедносните мерки поради полициската истрага на тројното убиство во средношколскиот центар, известува Анадолу.

Министерството за внатрешни работи на Унско-санскиот кантон претходно потврди дека во престрелката што се случила во средношколскиот центар во Сански Мост убиени се три лица, а едно лице е повредено.

„Инцидентот се случил во 10:15 часот. Возрасен маж со огнено оружје, автоматска пушка, уби тројца вработени во гимназијата ‘Сански мост’ и се обидел да се самоубие“, изјави Аднан Бегановиќ, портпарол на МВР на Унско-санскиот кантон.

Тој додаде дека мажот се здобил со тешки телесни повреди и со брза помош на Здравствениот дом „Сански мост“ бил однесен во Ургентниот центар во Бања Лука.

„Повредите се опасни по живот, полицијата е на самото место, врши истрага прибирајќи информации за утврдување на фактите и околностите зошто и како дошло до овој немил настан“, рече Бегановиќ.