Блинкен: „Украинците се борат за својата земја, Русите не“

ВАШИНГТОН (АА) - Американскиот државен секретар Ентони Блинкен, при посетата на главниот град Киев, изјави дека Украина постигнува „вистински напредок“ во контраофанзивата против Русија и нагласи дека Вашингтон прави сѐ за да ја максимизира својата поддршка за земјата, јавува Анадолу.

„Претседателот (Владимир) Зеленски штотуку се врати од првите линии, па можев директно од него да ја слушнам неговата оцена за контраофанзивата. Мислам дека многу се совпаѓа со нашата, што е, како што реков, реален напредок во последните недели“, изјави Блинкен за новинарите за време на заедничката прес-конференција со неговиот украински колега Дмитро Кулеба.

„Правиме сè што можеме за да ја максимизираме нашата поддршка за Украина додека таа ја спроведува контраофанзивата“, рече тој.

„Покрај извонредната работа што ја вршат Украинците, дури и покрај опремата, поддршката, обуката што ја обезбедуваме ние и десетици други земји, фундаментална разлика е тоа што Украинците се борат за својата земја, за сопствената иднина, за нивната сопствена слобода; Русите не. И тоа ми дава огромна доверба дека Украина ќе надвладее“, истакна американскиот државен секретар.

Блинкен ја повтори својата претходна изјава дека Украина вратила повеќе од 50 отсто од територијата што Русија ја одзела од почетокот на војната во февруари 2022 година.

„Напредокот во тековната контраофанзива во изминатите неколку недели се забрза. Оваа нова помош ќе помогне да се одржи и да се создаде иден импулс“, рече тој.

Украинскиот министер Кулеба, од своја страна, истакна дека американската воена поддршка е „најпрофитабилната инвестиција во безбедноста на Европа и евроатлантскиот простор, како и на целиот свет“.

„Денес Украина, со поддршката од партнерите, ја спречува Русија во наметнувањето на нејзината волја на другите земји“, истакна тој.

„Секој во светот што се сомневаше дека Украина и САД ќе стојат рамо до рамо до крајот на оваа војна, денес доби моќен сигнал дека греши. Заедно одиме напред бидејќи знаеме дека оваа војна не е само за иднината на Украина туку за иднината на светот“, порача Кулеба.

Дводневната посета на Блинкен е негова четврта посета на Украина.

За време на посетата тој најави 1 милијарда долари нова американска поддршка за Украина, меѓу кои и 665,5 милиони долари нова воена и цивилна безбедносна помош.

Новиот пакет помош вклучува системи за ракетно лансирање ХИМАРС, противтенковско оружје Џавелин, тенкови Абрамс и други оружени системи, изјави портпаролката на Белата куќа, Карин Жан-Пјер.

Соединетите Американски Држави, исто така, првпат ќе ја снабдат Украина со муниција со осиромашен ураниум, што Русија рече дека ќе го третира како ескалација на конфликтот.