Burak Bir
01 Јуни 2023•Ажурирај: 02 Јуни 2023
ЛОНДОН (АА) - Насилството во северно Косово треба да се осуди, а сторителите треба да бидат повикани на одговорност, изјави денес шефот за надворешна политика на Европската Унија (ЕУ), Жозеп Борел, јавува Анадолу.
Борел даде изјава пред вториот Самит на Европската политичка заедница во Булбоака, Молдавија, на кој се собираат лидерите на европските земји и шефовите на институциите на ЕУ.
„Мора да инсистираме на тоа дека насилството не е начин“, рече тој, потсетувајќи дека во средата се сретнал со косовскиот премиер Албин Курти и дека очекува да се сретне со српскиот претседател Александар Вучиќ.
„Сите мора да се обидат да избегнат секаков вид ескалација и некоординирани потези“, додаде Борел.
Косово го зафатија тензии откако демонстранти се судирија со безбедносните сили во северните општини во кои доминира српското население поради изборот на градоначалници етнички Албанци.
За време на судирите беа повредени најмалку 30 војници на НАТО.
Во врска со денешниот напад на Русија врз Киев, во кој меѓу загинатите има две деца, Борел рече дека ова е уште еден знак дека „Русија продолжува да го напаѓа цивилното население во Украина“.
„Се надевам дека присуството на толку многу лидери тука, многу блиску до Украина, на неколку километри од границата, ќе прати силна порака за единството на многу, многу држави... за одбраната на меѓународниот поредок, за одбрана на правата на луѓето, бранејќи го суверенитетот на земјите.“
Тој, исто така, нагласи дека стабилноста, поврзаноста и безбедноста се трите клучни зборови на Самитот од гледна точка на градење заедничка политичка рамка на ЕУ.
