Британските пратеници гласаа за забрана на групата Палестинска акција, илјадници се спротивставуваат на потегот

ЛОНДОН (АА) - Британските пратеници гласаа за забрана на пропалестинската активистичка група Палестинска акција како терористичка организација, јавува Анадолу.

Нацрт-наредбата за измена на Законот за тероризам од 2000 година и забрана на три организации, вклучително и Палестинска акција, која формално ја презентираше министерката за внатрешни работи Ивет Купер претходно оваа недела, беше усвоена во Долниот дом со 385 гласа „за“ и 26 „против“.

Наредбата, исто така, забранува две неонацистички групи, Култот на убијци на манијаци (MMC) и Руското императорско движење (RIM).

Министерот за внатрешни работи Ден Џарвис изјави: „Со спроведувањето на оваа мерка ќе го отстраниме привидот на легитимитет на Палестинска акција, ќе ја прекинеме нејзината финансиска поддршка и ќе ги ослабиме нејзините напори за регрутирање и радикализација на поединци да вршат терористички активности во нејзино име.“

Оваа одлука следува по инцидентот на 20 јуни, кога активисти од Палестинска акција упаднаа во воената база Брајз Нортон во Оксфордшир и оштетија два авиона во знак на протест поради поддршката на Обединетото Кралство на Израел и нападите врз Појасот Газа.

Забраната предизвика остри реакции од политичари, културни работници и организации за човекови права. Над 400 културни личности ја повикаа Владата да се повлече од намерата за забрана на групата и да престане со вооружување на Израел.

Обединетите нации, исто така, изразија загриженост – нивни експерти предупредија дека ваквата забрана би можела да биде во спротивност со меѓународните стандарди и би можела да го загрози правото на легитимно несогласување и протест.

По гласањето, портпаролот на Палестинска акција изјави: „Уверени сме дека оваа незаконска наредба ќе биде поништена. Како што истакнаа и експертите на ОН, прскањето со црвена боја и прекинувањето на работењето на израелската воена компанија Елбит Системс не е тероризам.“

Наредбата сега ќе оди на разгледување во Горниот дом, каде што се очекува да биде конечно одобрена наредните денови.

Доколку биде усвоена, ќе биде кривично дело членството или јавното изразување поддршка за овие групи, со можност за казна затвор до 14 години.

Зборувајќи на собирот, Саид Таџи Фаруки од Палестинска акција рече: „Самиот принцип на солидарност со Палестина се криминализира.“

Во меѓувреме, илјадници луѓе се собраа пред канцеларијата на премиерот на Даунинг стрит во среда за да се спротивстават на одлуката на Владата.

„Ова нема да заврши со Палестинска акција. Палестинска акција е почеток. (Ова е) првиот слој на угнетување и ќе продолжи. И ова е она што најмногу ме ужасува. Не само што движењето Палестинска акција е цел на напади, туку и самиот принцип на солидарност со Палестина е криминализиран“, рече тој.

Зара Султана, независната пратеничка од Ковентри Југ, рече дека ако оваа наредба биде усвоена, луѓето би можеле да се соочат со 14 години затвор „едноставно затоа што се тука за поддршка на Палестинска акција“.

„Би можела да одам в затвор, секој овде може да оди в затвор затоа што носел значка, споделувал објава“, забележа таа.

„Станува збор за страв. Станува збор за замолчување на ова прекрасно меѓународно разновидно движење што го изградивме“, додаде таа.