Венецуелскиот претседател Мадуро ја пофали одлуката на својот мексикански колега за бојкотирање на „Самитот на Америка“

ИСТАНБУЛ (АА) - Венецуелскиот претседател Николас Мадуро денес ја пофали одлуката на неговиот мексикански колега Андрес Мануел Лопез Обрадор да не присуствува на „Самитот на Америка“, што се одржува во Лос Анџелес од 6 до 10 јуни, пренесува Агенција Анадолија (АА).

Во видео пораката објавена на неговиот профил на Твитер, Мадуро ја пофали „јасноста и храброста на мексиканскиот претседател Обрадор“, и додаде дека изоставувањето на земјите како Куба, Никарагва и Венецуела е чин на дискриминација од страна на Соединетите Американски Држави (САД).

Мексиканскиот претседател Обрадор вчера на прес-конференција најави дека нема да присуствува на самитот, а на настанот ќе го испрати министерот за надворешни работи Марсел Ебрард.

Вашингтон на самитот ги покани само оние земји со кои има силни односи, а исклучувањето на трите земји доведе до тоа некои лидери во регионот да го бојкотираат настанот.

Деветтиот „Самит на Америка“ оваа година се одржува под слоганот за градење одржлива, отпорна и праведна иднина со посебен акцент на граѓанското општество и приватниот сектор во овој голем, разновиден регион.