Во Газа се убиени 11 новинари, повеќе од 20 се повредени

ИСТАНБУЛ (АА) - Единаесет новинари се убиени во Појасот Газа, повеќе од 20 се повредени, а двајца се водат како исчезнати од почетокот на воздушните напади од страна на Израел, соопшти палестинската група на новинари, јавува Анадолу.

Според соопштението објавено вчера од Комитетот за слобода, поврзан со Синдикатот на палестинските новинари, документирано е дека 11 палестински новинари се убиени во израелските воздушни напади од 7 октомври.

Документирано е и дека 20 новинари биле повредени.

„По најавата за целосно или делумно гранатирање на приближно 20 домови на новинари, израелската Армија се засили и директно гаѓаше на резиденциите на неколку новинари“, се вели во соопштението.

Ова доведе до повреди и трагична загуба на членови на семејствата.

Покрај тоа, околу 50 штабови и медиумски институции беа уништени како резултат на гранатирањето, вклучително и медиумската мрежа „Ал Акса“, новинската агенција „Маан“, весникот „Ал-Кудс“, радио „Баладна“, радио „Заман“, радио „Ал-Куран“, канцеларијата на „Ал-Џезира“, телевизија „Палестина“ и канцелариите на АФП, според извештајот.

Во извештајот се осудува и мешањето во работата на медиумските куќи.

„Каналот Ал-Акса престана да се емитува преку сателитот Еутелсат како одговор на притисокот од окупацијата“, се вели во соопштението.

Во извештајот исто така се посочува на директните закани до многу новинари и на многу израелски објави во кои се бара елиминација на новинарите.