Во голема експлозија во магацин за средства за огномет загинаа најмалку девет лица во Тајланд

БАНГКОК (АА) - Во голема експлозија во магацин за средства за огномет на југот на Тајланд денес животот го загубија најмалку девет лица, а десетици се повредени, објави „Таи ПБЦ“, пренесува Анадолу.

Гувернерот на провинцијата Наративаш, Санан Понгаксорн, за „Таи ПБЦ“ изјави дека најмалку 115 луѓе се повредени, од кои многумина се во тешка состојба.

Понгаксорн додаде дека од 500 до 800 луѓе што живеат во близина можеби ќе бидат принудени да бидат преместени во привремени засолништа.

На видеоснимките објавени на социјалните мрежи се гледа облак од дим над тоа подрачје и многу оштетени објекти, автомобили и мотоцикли, како и улици прекриени со урнатини. Многу куќи и други згради имаат урнати покриви и ѕидови.

Според податоците на Одделението за превенција и ублажување на катастрофата, оштетени се околу 100 станбени објекти на тоа подрачје.

Гувернерот Понгаксорн изјави дека експлозијата најверојатно е предизвикана од градежните работи што се извршувале во магацинот и при заварување метал дошло до палење на средствата за огномет и настанала експлозија.