Во Женева започнаа втората рунда преговори меѓу Иран и САД за нуклеарната програма

ТЕХЕРАН (АА) – Во Женева започнаа втората рунда индиректни нуклеарни преговори меѓу САД и Иран.

Според новинарот на Анадолу, новата рунда преговори официјално започнале во Амбасадата на Оман во Женева со посредништво на Оман.

Иранската делегација, предводена од министерот за надворешни работи Абас Арагчи, пристигна во просториите на Амбасадата на Оман во Женева, по што пристигна и американската делегација. Двете делегации разговараа со министерот за надворешни работи на Оман, Бадр Албусаиди.

Според јавувањата, барањата на Иран во оваа рунда индиректни преговори вклучуваат целосно укинување на санкциите и дискусии за мерки за градење доверба во врска со нуклеарната програма на Техеран.

Американската делегација ја предводат американскиот претставник Стив Виткоф и советникот на претседателот Доналд Трамп, Џаред Кушнер.

Иран и САД ја продолжија својата индиректна дипломатија за нуклеарната програма во Мускат претходно овој месец со посредништво на Оман, речиси по осум месеци откако преговорите беа прекинати по конфликтот Иран - Израел.

Оценките од двете страни беа позитивни по последната рунда преговори што се одржаа во услови на зголемени тензии поради зголемувањето на военото присуство на САД во регионот на Персискиот Залив.

Претходно денес, портпаролот на иранското Министерство за надворешни работи, Есмаил Багаи, изјави дека фокусот на оваа нова рунда индиректни преговори меѓу Техеран и Вашингтон ќе биде нуклеарното прашање.

Багаи, исто така, истакна дека Арагчи вчера разговарал со генералниот директор на МААЕ, Рафаел Гроси, за техничките прашања поврзани со нуклеарното досие на Иран.

Во пресрет на преговорите, американскиот претседател Доналд Трамп изјави дека ќе биде вклучен „индиректно“ во индиректните преговори со Иран во Женева.

„Индиректно ќе бидам вклучен во тие преговори и тие ќе бидат многу важни“, им рече Трамп на новинарите вчера на пат кон Вашингтон кога го прашаа што очекува од втората рунда индиректни нуклеарни преговори.

„Ќе видиме што ќе се случи“, додаде тој.