Во лавина во северниот дел на Индија загинаа 26 планинари

ЊУ ДЕЛХИ - Најмалку 26 планинари загинаа во лавина во северниот дел на Индија, известува Агенција Анадолија (АА).

Станува збор за планинари приправници и инструктори од Планинарскиот институт „Нехру“ во индиската држава Утараканд.

Властите потврдија дека во лавината животот го загубиле 26 од 41 планинар, а 12 се успешно спасени.

Во соопштението што го објавија властите се наведува дека продолжуваат спасувачките активности на пребарување и спасување на три исчезнати лица.

Ашок Кумар, шеф на полицијата на Утараканд, потсети дека лавината се случи на 4 октомври на врвот на Гархвал Хималаи.

Лавините се вообичаена појава во планинските региони на Утараканд. Најмалку 200 лица ги загубија животите во свлечишта и поплави што минатата година беа предизвикани од пукањето на глечерите на Хималаите.