Во напад во центар за рехабилитација во Мексико убиени 24 лица

БУЕНОС АИРЕС

Во оружен напад во центар за рехабилитација во Мексико загинаа најмалку 24 лица, а ранети се 7, пренесува Агенција Анадолија (АА).

Локалните медиуми наведуваат дека нападот се случил во Центарот за рехабилитација на лица кои се лекуваат од зависност од наркотици во градот Ирапуато, во Гванахуато.

Педро Кортес Завала, секретар на Кабинетот за безбедност на Ирапуато, потврди дека според прелиминарните податоци, во Центарот се наоѓале 35 лица, а некои успеале да побегнат.

Напаѓачите, според неговите зборови, дошле со автомобил. Од лицата во Центарот барале да легнат на земја, а потоа ги убиле. Завала наведе дека сѐ уште не е утврдено кој го извршил нападот.

Во нападот кој на почетокот на минатиот месец е извршен во другиот центар за рехабилитација во Ирапуато, загинаа 10 лица.