Во последните 24 часа во Газа загинаа 112 Палестинци, билансот се искачи на 27.131

АНКАРА (АА) - Најмалку 112 Палестинци загинаа, а 148 се повредени во последните 24 часа во нападите што Израел продолжува да ги спроведува врз опколениот Појас Газа, соопшти денес Министерството за здравство на енклавата, јавува Анадолу.

„Израелската окупација (израелските сили) изврши 13 масакри врз семејства во Појасот Газа, оставајќи 112 загинати и 148 повредени во изминатите 24 часа“, истакна Министерството.

„Многу луѓе се наоѓаат под урнатините и на патиштата бидејќи спасувачите не можат да стигнат до нив“, се додава.

Не почитувајќи ја пресудата за привремените мерки на Меѓународниот суд на правдата, Израел продолжува со нападите врз Појасот Газа од 7 октомври во кои загинати се најмалку 27.131 Палестинец, главно жени и деца, а 66.287 се повредени, според палестинските здравствени власти.

Израел започна напади врз Појасот Газа по прекуграничниот напад на Хамас, во кој Тел Авив вели дека загинале речиси 1.200 луѓе.

Израелската офанзива остави 85 отсто од населението во Газа внатрешно раселено, акутен недостиг на храна, чиста вода и лекови, и 60 отсто од инфраструктурата на енклавата оштетена или уништена, според Обединетите нации.